რუსეთმა ყაბარდო-ბალყარელი ფემინისტი აქტივისტი, სოციალურ მედიაში კომენტარის გამო, "ტერორიზმის გამართლებაში" დაადანაშაულა.

რუსეთის საგამოძიებო კომიტეტმა ჟურნალისტ და ფემინისტ აქტივისტს ზალინა მარშენკულოვას ბრალი 10 აპრილს წაუყენა.

რუსული საინფორმაციო ტელეგრამის არხი BAZA იტყობინება, რომ მარშენკულოვას ბრალი წაუყენეს მას შემდეგ, რაც კომენტარი გააკეთა რუსი ომის მომხრე ბლოგერის, ვლადლენ თათარსკის მკვლელობაზე. თათარსკი სანქტ-პეტერბურგში, აფეთქების შედეგად მოკლეს. შემთხვევის დროს დაშავდა 40-ზე მეტი ადამიანი.

მას შემდეგ, რუსეთი უკრაინას ადანაშაულებს თავდასხმის ორგანიზებაში, ხოლო უკრაინა რუსეთს შიდა ტერორიზმში ადანაშაულებს.

3 აპრილს მარშენკულოვამ გააკრიტიკა თათარსკი და თქვა, რომ ის "მოიმკა, რაც დათესა".

"არ მგონია, საჭირო იყოს თვალთმაქცური თანაგრძნობა კანიბალის, აგრესორის, ყოფილი ყაჩაღის გარდაცვალების გამო, რომელიც მხარს უჭერდა უკრაინაში მომხდარ მკვლელობებს, იმ ადამიანებისას, რომლებსაც არავისთვის არაფერი დაუშავებიათ", — დაწერა მან Telegram-ზე.

მარშენკულოვას, რომელიც 2022 წლის თებერვალში უკრაინაში რუსეთის სრულმასშტაბიანი შეჭრის შემდეგ, რუსეთის ფარგლებს გარეთ იმყოფება, ბრალი დაუსწრებლად წაუყენეს.

ხუთშაბათს მან თქვა, რომ "არ გაუკვირდა" და აღნიშნა, რომ მის წინააღმდეგ წაყენებული ბრალდებები ქაოსურია.

"დილა იწყება არა ყავით, არამედ უმიზეზო სისხლის სამართლის საქმით. ადვოკატებთან მაქვს ურთიერთობა; მათ ჯერ არ უნახავთ საქმე“, — დაწერა მან Telegram-ზე.

"რა თქმა უნდა, არ მიკვირს. ისინი ახლა მიზანში იღებენ ყველას, "ტერორიზმის გამართლების" მიზეზით, ვინც ომს არ ეთანხმება."

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.