77 წლის ინგლისელმა ბაბუმ, რომელსაც უკურნებელი დაავადება აქვს, ლატარიაში £1 მილიონი მოიგო. იან ანდერსონს და მის ცოლ მარლენს, სურთ, რომ დარჩენილი ცხოვრება კომფორტულად და ბედნიერად გაატარონ. წყვილი უკვე 32 წელია ერთადაა და 2 შვილი, 3 შვილიშვილი და ერთი შვილთაშვილი ჰყავთ.

ფოტო: Allwyn

იანს ფილტვის ფიბროზი აქვს და მუდმივი ჟანგბადის მილი სჭირდება, რათა ჰაერი მიაწოდოს. მარლენის თქმით, ამ თანხით შეძლებენ, რომ იანმა დარჩენილი ცხოვრება უზრუნველად გაატაროს.

"ამ თანხას უკეთეს დროს ვერ მოვიგებდით. ახლა შეგვიძლია, რომ იანმა ის დრო, რაც დარჩა, საუკეთესოდ გაატაროს. მისი ჯანმრთელობის მდგომარეობა უარესდება და სუნთქვა უჭირს, რის გამოც კიბეზე ასვლა არ შეუძლია. სწორედ ამიტომ, ამჟამად ჩვენი მისაღები ოთახი საძინებლად გვაქვს გადაკეთებული. ამ ფულით ახალ ერთსართულიან სახლს ვიყიდით", — ამბობს მარლენი.

იანი თვლის, რომ დაავადება სამუშაო პირობებმა გამოიწვია — მან ცხოვრების დიდი ნაწილი სამშენებლო ინდუსტრიაში გაატარა, რა დროსაც დამაზიანებელ ნივთიერებების გარემოცვაში სუნთქვა ხშირად უწევდა.

მარლენი იხსენებს, რომ იანის დიაგნოზამდე ბედნიერად ცხოვრობდნენ და ბევრს მოგზაურობდნენ. მისი თქმით, თავდაპირველად ეგონათ, რომ £1000 მოიგეს, თუმცა შემდეგ აღმოაჩინეს, რომ საპრიზო თანხა ბევრად მეტი იყო.

"ნულების თვლა რომ დავიწყე თვალებს არ ვუჯერებდი. ფულით ბევრ რამეს იყიდი, თუმცა ჯანმრთელობას ვერა, სწორედ ამიტომ, ერთადერთი, რაც შეგვიძლია, ისაა, რომ ჩვენი ცხოვრება გაცილებით კომფორტულად ვაქციოთ", — აღნიშნავს მარლენი.