გუშინ საღამოს, თბილისში, ჩეჩენი დევნილი და ბლოგერი ტუმსო აბდურახმანოვი დააკავეს. ამის შესახებ ინფორმაციას ეხო კავკაზა ავრცელებს. მათი განმარტებით, ბლოგერმა რედაქციაში აუდიო მესიჯები გააგზავნა, სადაც საუბრობდა, რომ იგი პატიმრობაში იმყოფება და ვერ ახერხებს დროულად უპასუხოს კითხვებს.

ბლოგერმა არ ისურვა დაკავების მიზეზებზე საუბარი. მან აღნიშნა, რომ არ დგას მისი რუსეთისთვის გადაცემის საკითხი.

ტუმსო აბდურახმანოვი ჩეჩენი ძალოვანი სტრუქტურების მიერ არაკანონიერი დევნის მსხვერპლი გახდა მას შემდეგ, რაც გროზნოში, იმდროინდელი ადმინისტრაციის უფროსის – რამზან კადიროვისა და მის დეიდაშვილის ისლამ კადიროვის კორტეჟს გზა არ დაუთმო.

ამის შემდეგ კადიროვი ბლოგერს ემუქრებოდა, აბდურახმანოვმა დატოვა ჩეჩნეთი და პოლიტიკური თავშესაფრის თხოვნით მიმართა საქართველოს მთავრობას. ეხო კავკაზას ინფორმაციით, ამ ეტაპზე სააპელაციო სასამართლო განიხილავს ტუმსო აბდურახმანოვის სარჩელს. ბლოგერმა მისთვის პოლიტიკური თავშესაფრის მინიჭებაზე უარი გაასაჩივრა.

აბდურახმანოვმა არაერთხელ გააგზავნა განცხადება უკანონი დევნისა და თვალთვალის შესახებ რუსეთის გენერალურ პროკურატურაში. რუსეთიდან განცხადებები ჩეჩნეთში იგზავნებოდა, საბოლოო ჯამში კი რეაგირების გარეშე რჩებოდა.