მოკლედ: პალესტინის ჯანდაცვის სამინისტროს ინფორმაციით, ღაზაში, ისრაელის შეტევებს, საერთო ჯამში, 25 ათასზე მეტი ადამიანი ემსხვერპლა.

  • მათი ინფორმაციით, ბოლო 24 საათში დაიღუპა 178 ადამიანი.

დეტალები: ბრძოლის ფონზე, ისრაელის პრემიერ-მინისტრმა ბენიამინ ნეთანიაჰუმ კვლავ უარი განაცხადა პალესტინის სახელმწიფოს შექმნაზე.

  • თეთრ სახლში აცხადებენ, რომ აშშ-სა და ისრაელს განსხვავებული ხედვები აქვთ, როდესაც საქმე ეხება კონფლიქტის ორი სახელმწიფოს პრინციპით გადაწყვეტას.

სტრიქონებს შორის: ამ პრინციპით, ისრაელის გვერდით უნდა შეიქმნას პალესტინის დამოუკიდებელი სახელმწიფო და ორივე ერს საკუთარი ტერიტორია უნდა ჰქონდეს.

ოქტომბრის თავდასხმებს გუშინ ჰამასმა უწოდა "აუცილებელი ნაბიჯი“ ისრაელის მიერ პალესტინის ტერიტორიების ოკუპაციის წინააღმდეგ და პალესტინელი ტყვეების გათავისუფლების უზრუნველსაყოფად.

  • ისრაელის საჰაერო და სახმელეთო ოპერაცია, ამჟამად, ფოკუსირებულია ღაზის სამხრეთით. შეიარაღებულ ძალებში დარწმუნებულები არიან, რომ ჰამასის უმაღლესი მეთაურები ხან-იუნისში, ან მის ქვეშ, მიწაში მდებარე კომპლექსში არიან გამაგრებული.
  • კონფლიქტის დაწყებიდან სამ თვეზე მეტი გავიდა და ისრაელი, რომლის არმიის შესაძლებლობები ბევრად აღემატება ჰამასისას, კვლავ აწყდება მნიშვნელოვან წინააღმდეგობას ღაზაში.

აშშ-ის სადაზვერვო სააგენტოების ცნობით, ისრაელის არმიამ მოკლა ჰამასის მებრძოლების 20-30%, რაც ბევრად ჩამოუვარდება ნეთანიაჰუს გაცხადებულ მიზანს შეიარაღებული ჯგუფის "სრული განადგურების" შესახებ.

მოხსენებაში ასევე ნათქვამია, რომ ჰამასს ჯერ კიდევ აქვს საკმარისი საბრძოლო მასალა, რათა განაგრძოს ისრაელსა და მის ძალებზე თავდასხმა თვეების განმავლობაში, რაც ომის გაჭიანურების საფუძველს აჩენს.

მსგავსი: ადამიანები, ადგილები და ტერმინები, რომლებიც ისრაელ-პალესტინის კონფლიქტში უკეთ გარკვევაში დაგვეხმარება

რას განწყობებია ისრაელში: ჰამასის ტყვეობაში მყოფი ადამიანების ნათესავების პროტესტი გრძელდება, ისინი მოუწოდებენ ნეთანიაჰუს, უპირატესობა მიანიჭოს არა ჰამასის განადგურებას, არამედ — მძევლების გათავისუფლებას.

  • ასევე, ჩამოყალიბდა ომის წინააღმდეგი ჯერ კიდევ შედარებით მცირე მოძრაობა, რომელიც შეძრწუნებულია ღაზისთვის მიყენებული ზარალით .
  • ბოლო გამოკითხვის თანახმად, ისრაელში მოსახლეობის მხოლოდ 15%-ს მიაჩნია, რომ ომის დასრულების შემდეგ, ბენიამინ ნეთანიაჰუ თანამდებობაზე უნდა დარჩეს.

ბოლო ხაზი: ისრაელმა თავდასხმა ღაზაზე 7 ოქტომბერს დაიწყო — მას შემდეგ, რაც ისრაელის ტერიტორიაზე შეიჭრნენ ჰამასის ტერორისტები, მოკლეს 1300 და ტყვედ აიყვანეს 240-ზე მეტი ადამიანი.

მსგავსი: რა მოხდება ღაზაში, როდესაც ომი დასრულდება