რა ხდება: პაკისტანი აცხადებს, რომ გუშინ, ირანის თავდასხმის შედეგად, ორი ბავშვი დაიღუპა და სამი დაიჭრა.

• ირანმა განაცხადა, რომ სამიზნე იყო ორი ბაზა, რომლებიც დაკავშირებულია ბოევიკთა დაჯგუფება ჯაიშ ალ-ადლთან.
• თუმცა პაკისტანმა ეს განცხადება უარყო და თავდასხმას უწოდა "უკანონო აქტი", რომელსაც, შესაძლოა, "სერიოზული შედეგები მოჰყვეს".

დეტალები: პაკისტანი უკვე მესამე ქვეყანაა ერაყისა და სირიის შემდეგ, რომელსაც, ბოლო რამდენიმე დღის განმავლობაში, ირანი თავს დაესხა.

• ირანის მიერ პაკისტანზე სარაკეტო თავდასხმა თითქმის უპრეცედენტოა. დარტყმა განახორციელეს ორი ქვეყნის საზღვარზე მდებარე ბალუჩისტანის პროვინციაში მდებარე სოფელზე.
• პაკისტანის საგარეო საქმეთა სამინისტრომ მკაცრად დაგმო "ირანის მიერ მისი საჰაერო სივრცის არაპროვოცირებული დარღვევა".
• უწყებამ ინციდენტს უწოდა "სრულიად მიუღებელი" და დასძინა, რომ "კიდევ უფრო შემაშფოთებელია, რომ ეს უკანონო ქმედება მოხდა პაკისტანსა და ირანს შორის, კომუნიკაციის რამდენიმე არხის არსებობის მიუხედავად".
• პაკისტანმა მომხდარს "სუვერენიტეტის აშკარა დარღვევა" უწოდა და შედეგებზე პასუხისმგებლობა ირანს დააკისრა.

კონტექსტი: ირანმა, ორშაბათს გვიან, ბალისტიკური რაკეტებით თავდასხმა განახორციელა ერაყის ჩრდილოეთით, ქალაქ ერბილში მდებარე სამიზნეებზე. ფაქტი დაგმო აშშ-მა.

ირანის თავდასხმები ხდება ახლო აღმოსავლეთში გაზრდილი დაძაბულობის ფონზე, რაც ისრაელსა და ირანის მიერ მხარდაჭერილი ჰამასის ომს მოჰყვა.

ირანმა განაცხადა, რომ არ სურს ჩართვა უფრო ფართო კონფლიქტში, მაგრამ მისი ეგრეთ წოდებული წინააღმდეგობის ღერძის ჯგუფები ახორციელებენ თავდასხმებს ისრაელზე და მის მოკავშირეებზე, პალესტინელებისთვის სოლიდარობის გამოსახატავად.

სტრიქონებს შორის: წინააღმდეგობის ღერძი არის ანტიისრაელური და ანტიდასავლური არაფორმალური პოლიტიკური და სამხედრო კოალიცია, რომელსაც ხელმძღვანელობს ირანი. მასში შედის სხვადასხვა სამხედრო დაჯგუფება, რომელიც მოქმედებს შუა აღმოსავლეთში, მათ შორის — პალესტინური ჰამასი, ლიბანური ჰეზბოლა და ჰუსიტები, იემენიდან.

ჰეზბოლა საზღვართან დაუპირისპირდა ისრაელის შეიარაღებულ ძალებს. შიიტური დაჯგუფების მებრძოლებმა დრონები და რაკეტები გაუშვეს აშშ-ის ძალების წინააღმდეგ ერაყსა და სირიაში; იემენელი ჰუსიტი მეამბოხეები კი თავს დაესხნენ გემებს წითელ ზღვაში.

ბოლო ხაზი: პაკისტანი და ირანი ათწლეულების განმავლობაში ებრძოდნენ შეიარაღებულ სეპარატისტულ ჯგუფებს, მათ შორის ჯაიშ ალ-ადლს.

• უსაფრთხოება მათი საერთო საზღვრის ორივე მხარეს, რომელიც, დაახლოებით, 900 კილომეტრია, ორივე ქვეყნის მთავრობისთვის, დიდი ხანია, მნიშვნელოვანი საზრუნავია.
• თეირანი ჯგუფს უკავშირებს გასულ თვეში, საზღვართან ახლოს განხორციელებულ თავდასხმებს, რომლებმაც ათზე მეტი ირანელი პოლიციელი იმსხვერპლა.
• მაშინ ირანის შინაგან საქმეთა მინისტრმა აჰმად ვაჰიდიმ განაცხადა, რომ დამნაშავეები ქვეყანაში პაკისტანიდან შევიდნენ.
• აშშ-ის ეროვნული დაზვერვის სამსახურის ინფორმაციით, ჯაიშ ალ-ადლი არის "ყველაზე აქტიური და გავლენიანი" სუნიტური მებრძოლი ჯგუფი, რომელიც მოქმედებს სისტან-ბალუჩისტანის რეგიონში.