სულ მალე ცნობილ ინგლისელ მომღერალზე, ემი ვაინჰაუსზე, გადაღებულ ბიოგრაფიულ ფილმს ვიხილავთ. ფილმის სახელწოდება ვაინჰაუსის ერთ-ერთი ჰიტიდანაა აღებული — Back to Black ("წყვდიადში დაბრუნება"). კინოსურათში მთავარ როლს მარისა აბელა ასრულებს, რეჟისორი კი სემ ტეილორ-ჯონსონი გახლავთ.

Back to Black-ის აღწერიდან ვიგებთ, რომ ფილმი "აქამდე უცნობი მხრიდან გვანახებს ვაინჰაუსის პოპულარობის ადრეული ეტაპს და რევოლუციური სტუდიური ალბომის გამოშვებას".

"ამბავი ემის პერსპექტივიდანაა მოყოლილი, ფილმი კი შეულამაზებლად გვაჩვენებს ფენომენად ქცეულ ქალს და მის ურთიერთობას, რომელიც ყველა დროის ერთ-ერთ ყველაზე ლეგენდარულ ალბომს დაედო საფუძვლად".

ფილმის პირველი ტრეილერი სულ ცოტა ხნის წინ გავრცელდა. მუსიკას იმიტომ არ ვწერ, რომ ცნობილი გავხდეო, ამბობს ვაინჰაუსად გარდასახული მარისა აბელა ვიდეოში.

"სიმღერებს იმიტომ ვწერ, რომ არ ვიცი, რას ვიზამდი, ასე რომ არ ვიქცეოდე".

Back to Black გრემის მფლობელი ემი ვაინჰაუსის ცხოვრების შესახებ გადაღებული პირველი მხატვრული ფილმია. მარისა აბელას გარდა, მასში ასევე მონაწილეობენ ჯეკ ო'კონელი (მომღერლის ქმრის, ბლეიკ ფილდერ-სივილის როლში), ედი მარსანი (მიჩ ვაინჰაუსის, ემის მამის როლში), ჯულიეტ ქოუენი (ემის დედის, ჯენის ვაინჰაუს-კოლინზის როლში) და ლესლი მენვილი (მუსიკოსის ბებიის, სინთია ვაინჰაუსის როლში).

თავისი თაობის ერთ-ერთ საუკეთესო მუსიკოსად მიჩნეული ვაინჰაუსი 2011 წელს, 27 წლის ასაკში გარდაიცვალა ალკოჰოლური მოწამვლის შედეგად. გამორჩეული ტემბრისა და შესრულების მანერით ცნობილი ვაინჰაუსი პირადი ცხოვრებითაც ხშირად ექცეოდა მედიისა და საზოგადოების ყურადღების ცენტრში. მომღერლის სიკვდილის შემდეგ, სირთულეებით სავსე მის ცხოვრებაზე არაერთი დოკუმენტური ნამუშევარი შექმნეს, მათ შორის 2015 წლის ბრიტანული ფილმი ემი, რომელმაც ოსკარიც დაიმსახურა.

რაც შეეხება Back to Black-ს, ფილმი ემი ვაინჰაუსის მემკვიდრეობისა და მუსიკოსის ლეიბლის, Universal Music Group-ის, ფინანსური მხარდაჭერით გადაიღეს. ნამუშევარს პირველად ბრიტანელი მაყურებელი იხილავს 12 აპრილს.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...