პოპულარული ქართული ინდი-როკ ჯგუფის, Bedford Falls-ის, წამყვანი ვოკალისტი დათო ჯიქია მსმენელს მალე სადებიუტო სოლო ალბომს შესთავაზებს. FULLMETAL GEORGIA — ასე ჰქვია ალბომს, რომელსაც 27 წლის მუსიკოსი QAJITODIA-ის სახელით გამოუშვებს. როგორც ინსტაგრამპოსტიდან ვიგებთ, მომდევნო კვირების განმავლობაში ალბომიდან ყოველი ტრეკი სათითაოდ გამოვა, სიმღერები კი ერთგვარად დამოუკიდებელი საქართველოს ისტორიას მოჰყვება, რადგან 1989 წლიდან 2000-იანებამდე პერიოდს შეეხება.

"ალბომში თავმოყრილია ეროვნული მოტივები, ბევრად უცნაური ბგერები და უბრალო ექსპერიმენტული მელოდიები, რადგანაც მუსიკა მიყვარს და ის საკმარისი არასოდესაა", — წერს ჯიქია და სიმღერების დასახელებებსაც გვიზიარებს.

ჯგუფი Bedford Falls 2014 წელს ჩამოყალიბდა და მისი ერთ-ერთი დამფუძნებელი სწორედ ჯიქიაა. ბენდის სადებიუტო ალბომმა This Is Your House დღის სინათლე 2019 წელს იხილა, 2022 წელს ჯგუფმა რჩეულ კომპოზიციებს კიდევ ერთ ალბომში მოუყარა თავი, 2023 წელს კი გამოვიდა ალბომი miende. სხვადასხვა წელს Bedford Falls გამოჩნდა Tbilisi Open Air-ის სცენაზე. შარშან მათ ევროპული ტურნეც მოაწყვეს.

Bedford Falls-ის დამფუძნებელ და ამიერიდან უკვე პროექტ QAJITODIA-ის შემქმნელ დათო ჯიქიას კი ასევე აქვს ჩაწერილი კოლაბორაციები სხვა ქართულ ჯგუფებთან: Killages-თან, 4D Monster Lobsters-თან და Circus Mircus-თან. ამასთან, პროექტის "მრავალი ხმა — ერთი სამშობლო" ფარგლებში მომღერალმა ჩაწერა დუეტი ნატო მეტონიძესთანაც.

აღსანიშნავია ისიც, რომ ჯიქიას შემოქმედება მხოლოდ მუსიკას არ მოიცავს; 2019 წელს მან სადებიუტო რომანი კაკაფონია გამოსცა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...