70 წლის საფინა ნამუკვაიას ცოტა ხნის წინ ტყუპი გოგო და ბიჭი შეეძინა. უგანდის საავადმყოფოს განცხადებით, საფინა ქვეყანაში ყველაზე ხანდაზმული ქალია, რომელმაც ყოველგვარი გართულების გარეშე იმშობიარა. საავადმყოფოს შეფასებით, ეს შემთხვევა ნამდვილ სასწაულს ჰგავს.

"ჩვენ შეუძლებელი შევძელით! 70 წლის აფრიკის უხუცეს დედას ტყუპების გაჩენაში დავეხმარეთ. დედა და ბავშვები თავს კარგად გრძნობენ", — ნათქვამია საავადმყოფოს განცხადებაში.

საფინამ პირველად 2020 წელს იმშობიარა და გოგო შეეძინა. როგორც საფინამ ინტერვიუში აღნიშნა, მეორე ორსულობის პერიოდი მისთვის ემოციურად უფრო რთული იყო, რადგან პარტნიორი დაშორდა, როცა მიხვდა, რომ ტყუპების გაჩენას აპირებდა.

"კაცებს არ მოსწონთ იმის გაგონება, რომ ერთ შვილზე მეტი ეყოლებათ. რაც ტყუპების შესახებ ვუთხარი, ჩემი პარტნიორი საერთოდ აღარ გამოჩენილა", — დასძინა საფინამ.

საფინას თქმით, შვილების გაჩენა მას შემდეგ გადაწყვიტა, რაც უშვილობის გამო არაერთხელ დასცინეს. "მეუბნებოდნენ, რომ სხვების შვილებზე ვზრუნავდი, ისინი კი გაიზრდებოდნენ და დამტოვებდნენ. ნეტავ, ვინ იზრუნებს შენზე როცა დაბერდებიო, ხშირად მიმეორებდნენ", — იხსენებს საფინა.

ახლა საფინა 3 შვილის დედაა, თავსაც კარგად გრძნობს და ახალდაბადებული ტყუპებიც ჯანმრთელები არიან. საფინას გადაწყვეტილებამ კი უკვე ბევრი ადამიანი აღაფრთოვანა.