რა ხდება: როგორც საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა განაცხადა, პარლამენტის წევრმა დავით სერგეენკომ სადეპუტატო უფლებამოსილების ვადამდე შეწყვეტის თაობაზე პარლამენტის თავმჯდომარეს 27 ოქტომბერს განცხადებით მიმართა.

დეტალები: "კომიტეტმა პარლამენტის რეგლამენტის შესაბამისად წარდგენილი განცხადების ნამდვილობა დაადგინა და მიაჩნია, რომ საქართველოს კონსტიტუციის და პარლამენტის რეგლამენტის შესაბამისად, პარლამენტის წევრ დავით სერგეენკოს ვადამდე შეუწყდეს პარლამენტის წევრის უფლებამოსილება", — აცხადებს პარლამენტი.

  • კომიტეტის მხარდაჭერილი გადაწყვეტილება პარლამენტის ბიუროს გაეგზავნება და საკითხი პარლამენტის პლენარულ სხდომაზე გავა.

ბოლო ხაზი: უცნობია, დეპუტატობასთან ერთად, დატოვებს თუ არა ის მმართველ პარტიას, ქართულ ოცნებას. ინფორმაცია სერგეენკოს პოლიტიკიდან წასვლის შესახებ, თავდაპირველად, 2023 წლის მარტში მას შემდეგ გავრცელდა, რაც ცნობილი გახდა, რომ ის იყო ერთ-ერთი დეპუტატი ქართული ოცნებიდან, ვინც რუსული კანონის კენჭისყრაში მონაწილეობა არ მიიღო.