ისლამისტური დაჯგუფება ჰეზბოლას ლიდერმა, ისრაელ-ჰამასის ომის დაწყებიდან, დუმილი დღეს პირველად დაარღვია. ჰასან ნასრალამ ჰამასი ისრაელზე თავდასხმისთვის შეაქო, თუმცა თქვა, რომ ეს შეტევა "100%-ით პალესტინური" იყო.

  • საუბრისას ჰასან ნასრალამ თქვა, რომ ღაზაში ომზე პასუხისმგებელი აშშ-ა.
  • მან, ასევე, მადლობა გადაუხადა ირანის მიერ მხარდაჭერილ ძალებს იემენსა და ერაყში. ისრაელისკენ დრონებს უშვებდნენ ჰუტი ამბოხებულები იემენიდან, ერაყის შიიტი მებრძოლები კი აშშ-ის ძალებს ესხმოდნენ თავს სირიასა და ერაყში.

რა მოლოდინები იყო ნასრალას გამოსვლასთან დაკავშირებით: რადგანაც 7 ოქტომბრის შემდეგ, მიმდინარე ომის შესახებ, ჰეზბოლას ლიდერს აქამდე არაფერი უთქვამს, დაანონსებული განცხადება ყურადღების ცენტრში აღმოჩნდა.

  • ვარაუდობდნენ, რომ ჰეზბოლას ლიდერი ომში ჩართვის შესახებ განაცხადებდა, თუმცა ეს ასე არ მოხდა.
  • ვიდეომიმართვის სანახავად, ლიბანის დედაქალაქ ბეირუთის ქუჩებში ათასობით ადამიანი შეიკრიბა.

ვინ არის ჰასან ნასრალა: ის ჰეზბოლას 1992 წლიდან ხელმძღვანელობს და მნიშვნელოვანი როლი შეასრულა დაჯგუფების პოლიტიკურ და სამხედრო ძალად ჩამოყალიბებაში.

ნასრალას აქვს ახლო ურთიერთობა ირანთან და მის უზენაეს ლიდერთან, აიათოლა ალი ხამენეისთან.

ნასრალა საჯაროდ რამდენიმე წელია, აღარ გამოჩენილა — ის, სავარაუდოდ, შიშობს, რომ შესაძლოა, ისრაელმა მოკლას, თუმცა სატელევიზიო განცხადებებს ყოველ კვირას აკეთებს.