რა ხდება? 31 ოქტომბერს პარლამენტის პლენარულ სხდომაზე, ქართული ოცნების დეპუტატებმა, ირაკლი ბერაიამ და ალუდა ღუდუშაურმა, შეურაცხმყოფელი, სექსისტური და ღირსების შემლახავი ლექსიკა გამოიყენეს პარლამენტში, ქალი დეპუტატების — თეონა აქუბარდიასა და ანა წითლიძის მიმართ.

• მომხდარს გმობს ორგანიზაცია დემოკრატიული კვლევის ინსტიტუტი (DRI) და ამას ქართული ოცნების მხრიდან პოლიტიკური ოპონენტების გენდერული ნიშნით დისკრიმინაციას უწოდებს.

რატომ არის მნიშვნელოვანი: ოცნების დეპუტატების მხრიდან, ქალი დეპუტატების მიმართ გამოთქმული ღირსების შემლახავი, უხამსი და დისკრიმინაციული განცხადებები სცდება პოლიტიკური სიტყვის და დებატების თავისუფლების ფარგლებს, — აცხადებს DRI.

რა შეიძლება იყოს ამის მიზანი: ორგანიზაციას მიაჩნია, რომ

• ოპოზიციონერ ქალებზე ქართული ოცნების წარმომადგენელთა სიტყვიერი თავდასხმა მიზნად ისახავს მათ დარცხვენას;
• ასევე, პოლიტიკურ სივრცეში სამოქმედო არეალის შეზღუდვას, ქცევით ნორმებზე გენდერული ნიშნით აპელირებით.

პრობლემაა, რომ: მიზოგინიურ, სექსისტური გამონათქვამებისა და გენდერული ნიშნით დისკრიმინაციისათვის მმართველ პოლიტიკურ ძალას პირველად არ მიუმართავს, — აცხადებს დემოკრატიული კვლევის ინსტიტუტი და პარტიის თავმჯდომარის მაგალითი მოჰყავს:

• 2020 წელს, ირაკლი კობახიძემ ელენე ხოშტარიას და ირმა ნადირაშვილს პარლამენტის სხდომაზე საბჭოთა კავშირის ჰიმნის ჩართვისთვის "სასოწარკვეთილი ნაციონალი დიასახლისები" უწოდა,
• 2023 წლის 20 სექტემბერს კი განაცხადა, რომ ქალთან პოლემიკაში ვერ შევა, რადგან "ასეთი წესია".

ორგანიზაცია მოითხოვს: პარლამენტის ეთიკის საბჭომ შეისწავლოს ალუდა ღუდუშაურისა და ირაკლი ბერაიას მხრიდან პარლამენტის ეთიკის კოდექსის დარღვევის საკითხი და მიიღოს შესაბამისი გადაწყვეტილება.

• გენდერული თანასწორობის მუდმივმოქმედ საპარლამენტო საბჭოს კი მიმართავს, იმოქმედოს და მიიღოს გადაწყვეტილება, რაც საქართველოს პარლამენტში შექმნის გენდერული ნიშნით დისკრიმინაციის დაუშვებლობის სტანდარტს.

რას ავალდებულებს კოდექსი დეპუტატებს: დეპუტატების ქცევის წესებს პარლამენტის წევრის ეთიკის კოდექსი განსაზღვრავს. კოდექსის მიხედვით,

• საქართველოს პარლამენტის წევრისთვის დაუშვებელია სხვისი ღირსების შემლახველი, უხამსი, სექსისტური, დისკრიმინაციული გამოსვლა, მიმართვა, მოქმედება.
• "ცალსახაა ამ დადგენილი წესების დარღვევა მმართველი პოლიტიკური ძალის წარმომადგენლების მხრიდან", — წერს ორგანიზაცია.

ბოლო ხაზი: DRI-ის განცხადებით, მაშინ, როდესაც ხელისუფლების მაღალი პოლიტიკური თანამდებობის პირების ერთ-ერთი უმნიშვნელოვანესი ამოცანა უნდა იყოს ქალთა უფლებების დაცვა, ამის საპირისპიროდ, მიზოგინიური, სექსისტური და გენდერული ნიშნით დისკრიმინაციის შემცველი განცხადებები იწვევს არა მხოლოდ კონკრეტული ადრესატის დისკრიმინაციას, არამედ "მსუსხავი ეფექტი" აქვს ქვეყანაში ქალთა უფლებების დაცვაზე.

გაიგე მეტი: რატომ არის დიდი პრობლემა ის, რაც პარლამენტში მოხდა