რატომ არის მნიშვნელოვანი: 7 ოქტომბერს, ადგილობრივი დროით 06:30 საათზე, ღაზადან ისრაელის მიმართულებით მასიური სარაკეტო თავდასხმა იყო, რაზეც პასუხისმგებლობა ჰამასმა აიღო.

• სროლები იყო ღაზა-ისრაელის საზღვრის იმ ნაწილშიც, სადაც მუსიკალური ფესტივალი მიმდინარეობდა.
• თავდასხმის შედეგად ფესტივალის ასეულობით დამსწრე დაიღუპა, ნაწილი მძევლად აიყვანეს.
• დაატყვევეს ებრაელი სამხედროები და სამოქალაქო პირებიც — ჰამასის გავრცელებულ ვიდეოებში ჩანს, რომ ისინი ძალადობენ მძევლებზე.
• ისრაელის თავდაცვის ძალებმა კონტრშეტევა და ჯარისკაცების მობილიზება დაიწყეს, გამოცხადდა საომარი მდგომარეობა.

რიცხვებში: ბოლო ოფიციალური მონაცემებით, ისრაელში დაღუპულია 1 008 ადამიანი, დაშავებულია 3 418.

• ღაზას სექტორთან მდებარე სოფელ კიბუც ბეერიში ჰამასის დახოცილი 100-ზე მეტი ადამიანის ცხედარი იპოვეს.
• ისრაელის კონტრშეტევის შედეგად კი 830 პალესტინელი დაიღუპა, 4 000 დაიჭრა და 137 000-ზე მეტი დევნილი გახდა.
• ისრაელის თავდაცვის ძალების (IDF) განცხადებით, ღაზას საზღვარი საბოლოოდ დაიხურა და ქვეყანაში 1 500 ტერორისტის გვამი იპოვეს.
• IDF ასევე აცხადებს, რომ თვითმფრინავებმა სამშაბათს დაარტყეს 200-ზე მეტ სამიზნეს ღაზაში, ალ-ფურქანის რაიონში.

დეტალები: სხვადასხვა ქვეყანა ავრცელებს ინფორმაციას მათი მოქალაქეების დაღუპვისა და დაკარგვის შესახებ.

• ამ ეტაპზე არსებული მონაცემებით, გარდაიცვალა 2 ქართველი-ებრაელი ოფიცერი, საქართველოს მოქალაქეები კი არ დაშავებულან.
• ჰამასი იმუქრება, რომ თუ ისრაელის საჰაერო თავდასხმები გაფრთხილების გარეშე გაგრძელდება მძევლებს მოკლავენ და კადრებს გაავრცელებენ.
• მათი მტკიცებით, 100-ზე მეტი ტყვე ჰყავთ, გაეროში ისრაელის ელჩმა კი თქვა, რომ შესაძლოა 150-მდე ადამიანი იყოს.
• ამავდროულად, ჰამასი უარს ამბობს, გაათავისუფლოს ისინი, სანამ ბრძოლები არ დასრულდება.
• ისრაელის ეროვნული უშიშროების სამინისტრო ამბობს, რომ სამოქალაქო უსაფრთხოების გუნდების შესაიარაღებლად 10 000 იარაღს გადასცემს.

ფრენები საქართველომდე: ისრაელში იმყოფებიან ქართველები, რომელთა ნაწილს მიმდინარე მოვლენების გამო ქვეყნის დატოვა სურს, ისინი ევაკუაციის სირთულეებზე საუბრობენ.

• სოციალურ ქსელში წერენ, რომ ბოლო დღეების განმავლობაში Georgian Airways-ის რეისებზე, რომლებიც თელ-ავივიდან თბილისში სრულდება, ბილეთები გაძვირდა, რამაც საზოგადოებაში უკმაყოფილება გამოიწვია.
• კრიტიკის პასუხად, ჯორჯიან ეარვეისმა განცხადება გამოაქვეყნა, რომელშიც, ტრადიციულად, თავის მართლებას კრიტიკოსებზე თავდასხმა მოაყოლა.
• "ამ მიმართულებაზე მძაფრი კონკურენციაა, რაც ბილეთის ფასებზე ყოველგვარ ხელოვნურ ჩარევას გამორიცხავს", — ამტკიცებენ ისინი.
• თუმცა სხვა ავიაკომპანიების, მაგალითად Turkish Airlines-ის და Pegasus-ის ავიარეისებზე, რომლებიც თელ-ავივიდან საქართველოსკენ სრულდება, ფასი რამდენიმე ასეული ლარით დაბალია.
• პრობლემაა ისიც, რომ ბილეთები მალევე ამოიწურა და მოქალაქეების ნაწილმა შეძენა ვერ შეძლო, ამიტომ საქართველოს ელჩმა ისრაელში, ლაშა ჟვანიამ დღეს განაცხადა, რომ დამატებითი რეისი დაინიშვნაზე მუშაობდნენ.
• 12 ოქტომბრის რეისი დაემატა, რომელიც თელავივიდან ადგილობრივი დროით 17:40 საათზე გამოფრინდება.
• ამ ეტაპზე ბილეთის ფასი 1 007 ლარია, მისი შეძენა კი ვებგვერდზეა შესაძლებელი, რადგან საქართველოს მთვარობა ამ ავიარეისებს არ აფინანსებს.

საჭიროების შემთხვევაში, საქართველოს მოქალაქეებს შეუძლიათ დარეკონ საელჩოს ცხელ ხაზზე:

• +972526919092
• +972 52-8888513
• +972 54-7386813