რა მოხდა: 14 ივლისს, კლინიკა ვივამედში ექსპრეზიდენტის მოსანახულებლად პოლონელი ექიმები შევიდნენ.

• ამავე დღის ბოლოს პენიტენციურმა სამსახურმა გაავრცელა განცხადება, რომ ვიზიტისას ერთ-ერთი პოლონელი ექიმის მხრიდან "გაუგებარი ინციდენტი" დაფიქსირდა.
• უწყებაში ამბობდნენ, რომ ექიმმა მიხეილ სააკაშვილისგან აღებული ნიმუში ქაღალდში გადაახვია და მის მალულად გატანას ფეხსაცმლის მეშვეობით ცდილობდა.
• "აღსანიშნავია, რომ ოფიციალური წესით აღებული ნიმუშის გატანის უფლება მათ მისცა თავად სამსახურმა, შესაბამისად, აღნიშნული ქმედება ექიმის მხრიდან სამედიცინო ეთიკურ და სამართლებრივ ნორმებთან შეუსაბამო საქციელს კიდევ უფრო მეტად ჰმატებს ბუნდოვანებას. ამ პიროვნებას ჩამოერთვა ახსნა-განმარტება, რომელიც ვერ ექვემდებარება ლოგიკურ ახსნას", — აცხადებდნენ პენიტენციურში.
• მათვე გამოაქვეყნეს მომხდარის ამსახველი ვიდეო მასალა.

ვივამედის კლინიკური დირექტორი, ნინო ნადირაძე ფეისბუქზე წერდა: "წინდებით და ფეხსაცმელებით გამოტანილი მასალა აიღეს მოწმეების გარეშე. რად უნდოდათ, სამეცნიერო თუ ოკულტური მიზნებისთვის, ვერ გეტყვით".

• კომენტარში კი განმარტა, როგორ ახსნა პოლონელმა ექიმმა მომხდარი.
• "ყველაფერს წინდებში ვინახავო, ჯიბეები არ მიყვარსო, ასე თქვა, ოღონდ მართლა", — ამბობდა ნადირაძე.

იუსტიციის მინისტრმა, რატი ბრეგაძემ საგარეო საქმეთა სამინისტროს მიმართა თხოვნით, მოესმინა პოლონეთის საელჩოს პოზიცია, რადგან სწორედ ის იყო ექიმების ერთ-ერთი რეკომენდატორი.

• 17 ივლისს სამინისტროში განაცხადეს, რომ ქართულმა მხარემ დააფიქსირა შეშფოთება ინციდენტის გამო და პოლონელ დიპლომატს განემარტა, რომ სახელმწიფო დაინტერესებულია, საზოგადოებას ჰქონდეს სრული ინფორმაცია სააკაშვილის ჯანმრთელობაზე.
• მათივე თქმით, ხაზი გაუსვეს, რომ პოლონელ მედიკოსთა მისიაში შემავალი ერთ-ერთი ექიმის საქციელი იწვევს გაუგებრობას, შეშფოთებას და სანდოობას უკარგავს პროცესს.
• როგორც უწყებაში აცხადებენ, შეხვედრაზე პოლონეთის ელჩმა აღნიშნა, რომ არ არის ინფორმირებული, რამ გამოიწვია პოლონელი ექიმის მსგავსი საქციელი.

პოლონეთის საგარეოს განცხადებით, ვივამედში მოხდა "შეთანხმებასთან შეუსაბამო, განუზრახველი და გაუთვალისწინებელი ინციდენტი", რაც, მათივე თქმით, დაუყოვნებლივ გაირკვა ადგილზევე და შემდეგ განიმარტა საქართველოს საგარეო საქმეთა მინისტრთან შეხვედრისას.

• "ამ კონტექსტში, საქართველოს იუსტიციის სამინისტროს დაქვემდებარებაში არსებული სპეციალური პენიტენციარული სამსახურის გადაწყვეტილება, გამოაქვეყნოს პოლონელი ექიმის ჩხრეკის ჩანაწერი და საქართველოს სახელმწიფო ორგანოების წარმომადგენლების არაერთი ემოციური განცხადება ეწინააღმდეგება კარგი თანამშრომლობის პრინციპებს", — ვკითხულობთ განცხადებაში.
• საგარეო ხაზს უსვამს, რომ არც ინციდენტი და არც საქართველოს ხელისუფლების მიერ მისი გამოაშკარავება გავლენას არ მოახდენს სააკაშვილის ჯანმრთელობის მდგომარეობის, ქართველი ექიმების საქმიანობის შეფასებისა და გამოკვლევების შედეგების გაანალიზების პროცესზე.