რატომ არის მნიშვნელოვანი: დღეს, საკანონმდებლო ორგანოში იუსტიციის უმაღლესი საბჭოს არამოსამართლე წევრების ასარჩევად 4 კანდიდატს შორის განმეორებითი კენჭისყრა ჩატარდა.

  • დეპუტატებს საბჭოს 2 წევრი რუსუდან კვინიკაძის, გიორგი კიკილაშვილის, ლევან ნემსაძისა და ნინო ნიშნიანიძისგან კანდიდატურებიდან უნდა შეერჩიათ.
  • მათ გუშინდელ კენჭისყრაზე დანარჩენ 22 კანდიდატზე მეტი, თუმცა არასაკმარისი ხმები მიიღეს.
  • თუმცა, ამავე სხდომაზე პარლამენტმა უკვე შეარჩია საბჭოს 3 არამოსამართლე წევრი: ტრისტან ბენაშვილი და ზურაბ გურასპაშვილი — 93-93 ხმით, გიორგი გზობავა კი 91 ხმით.
  • უმრავლესობაში ამჟამად 84 დეპუტატია, რაც იმას ნიშნავს, რომ კანდიდატებს მხარდაჭერა საპარლამენტო ოპოზიციის წევრებმაც გამოუცხადეს.
  • ოპოზიციის ნაწილი ფიქრობს, რომ ზოგიერთი მათგანი ქართულ ოცნებას გაურიგდა, სავარაუდო "ეჭვმიტანილებად" კი ნიკა მაჭუტაძე, ნატო ჩხეიძე, როსტომ ჩხეიძე, დილარ ხაბულიანი და ბაჩუკი ქარდავა დასახელდნენ.

დეტალები: მეორე ტურში გადასული 4 კანდიდატიდან 90 დეპუტატის ხმა ვერცერთმა ვერ მოიპოვა.

  • კვინიკაძეს, კიკილაშვილს, ნემსაძესა და ნიშნიანიძეს გუშინდელ კენჭისყრაზე მხოლოდ ოპოზიციის ხმები დააკლდათ, დღეს კი მათ მხარი არც უმრავლესობის დეპუტატებმა დაუჭირეს.
  • "უმრავლესობის წევრების მიმართ ჩემი მოწოდება იქნება, რომ მხარი არ დაუჭიროთ არცერთ კანდიდატს, ეს არის ფორმალური ჟესტი, დავიტოვოთ სივრცე იმისათვის, რომ გაიმართოს კონსულტაციები", — პროცედურას წინ ირაკლი კობახიძის ეს განცხადება უძღოდა.
  • პარლამენტის თავმჯდომარის, შალვა პაპუაშვილის თქმით, იმავე კანდიდატებს კენჭს რეგლამენტით გათვალისწინებულ დროს, 30 მაისს, უყრიან.