მედიაომბუდსმენმა გამოაქვეყნა ანგარიში, რომელიც აღწერს და სამართლებრივად აფასებს 2-9 მარტის პერიოდში ჟურნალისტურ საქმიანობაში უკანონო ხელშეშლის ფაქტებს, ასევე, სახელმწიფოს საპასუხო ნაბიჯებს.

რატომ არის მნიშვნელოვანი: ამ დროისთვის სახელმწიფოს ჯერ კიდევ არ გაუცია პასუხი კითხვებზე: არსებობდა თუ არა აქციების დაშლის სამართლებრივი საფუძველი; იცავდნენ თუ არა სამართალდამცველები აუცილებელ წესებს და იყო თუ არა აქციის დაშლისთვის გამოყენებული საშუალებები კანონიერი და პროპორციული.

• ორგანიზაციაში ამბობენ, რომ ვიდეოჩანაწერებითა და სხვა უტყუარი მტკიცებულებებით დასტურდება, აქციების დაშლისას ძალის არაპროპორციული გამოყენებისას მედიის წარმომადგენლებიც დაზიანდნენ.

დეტალები: ანგარიშში ნათქვამია, რომ რომ რუსული კანონის მიღების იდეის შემდეგ კიდევ ერთხელ გახდა მკაფიო ხელისუფლების ნება და გამოხატვის თავისუფლების საფრთხეები საქართველოში.

• მედიაომბუდსმენის განცხადებით, საგანგაშოა, რომ მარტის აქციებზე მედიის წარმომადგენლებზე სწორედ სამართალდამცველები ძალადობდნენ.
• "ისინი იყენებდნენ ისეთ ძალადობრივ მეთოდებს, როგორებიცაა: წიწაკის სპრეის სახეში შესხმა, წყლის ჭავლის დამიზნება, გაზის კაფსულების დამიზნებით სროლა, ფიზიკური შეურაცხყოფა (ქამრებით გათრევა, სქროლის სროლა, ჩარტყმა თავის არეში, მხარზე კამერით მომუშავე ოპერატორების ცემა ზურგის არეში, წიხლის ჩარტყმა), სიტყვიერი შეურაცხყოფა (გინება, დამამცირებელი მიმართვა, ძალადობის მუქარა), კამერაზე ხელის აფარება, იძულებით გაყვანა გადაღების ადგილიდან, პარლამენტის შენობიდან გაგდება და სხვა".
• დოკუმენტის თანახმად, მედიის წარმომადგენლების უფლებები დაირღვა პარლამენტის შენობაშიც, რასაც წინ უსწრებდა პარლამენტში აკრედიტაციის შემოღება, რაც, ორგანიზაციის შეფასებით, კიდევ ერთი პოლიტიკური იარაღი აღმოჩნდა ჟურნალისტების წინააღმდეგ.
• მედიაომბუდსმენის ინფორმაციით, ჟურნალისტურ საქმიანობაში ხელშეშლის საქმეზე სამართალდამცველები ჯერჯერობით გამოკითხულები არ არიან.

შინაგან საქმეთა სამინისტრო: ანგარიშში ნათქვამია, რომ სამართალდამცველები თავს ესხმოდნენ მშვიდობიან მომიტინგეებს, ამეტებდნენ უფლებამოსილებას არაპროპორციული ძალის გამოყენებითა და გამოხატვის თავისუფლების უკანონო შეზღუდვით.

• "სამინისტროს არ გაუკეთებია განცხადება, 2 მარტს მისი წარმომადგენლების მხრიდან უფლებამოსილების შესაძლო გადამეტების ფაქტებთან დაკავშირებით", — აცხადებს მედიაომბუდსმენი.

სპეციალური საგამოძიებო სამსახური: უწყებამ გამოძიება შსს-ის თანამშრომლების მხრიდან სამსახურებრივი უფლებამოსილების ძალადობით შესაძლო გადამეტების ფაქტებზე დაიწყო.

• მედიაომბუდსმენის შეფასებით, სპეციალური საგამოძიებო სამსახურის გამომძიებლები მაღალი სტანდარტით, კვალიფიციურად და აქტიურად ატარებდნენ მედიის წარმომადგენელთა გამოკითხვებს.
• დღის წესრიგშია 2 მარტს პარლამენტის შენობიდან On.ge-ის რედაქტორის, თამუნა გეგიძის, ფორმულას ფოტოჟურნალისტის, ვახო ქარელისა და ნეტგაზეთის ჟურნალისტის, მიხეილ გვაძაბიას გამოძევების ფაქტები.

რეკომენდაციები: მედიაომბუდსმენი მოუწოდებს შინაგან საქმეთა სამინისტროს, უარი თქვას აქციის დაშლის, სპეციალური საშუალებების გამოყენებისა და ადამიანების მიმართ ძალის გამოყენების პრაქტიკაზე.

• ასევე, მიიღოს გადაწყვეტილება 2-9 მარტს აქციების დაშლის შედეგად დაზარალებული პირების უფლებების აღიარებასა და ზიანის ანაზღაურებაზე.
• ორგანიზაცია მიმართავს პარლამენტს, დროულად გამოიძიოს შენობაში გამოვლენილი გადაცდომები და დაუყოვნებლივ გაატაროს ზომები პარლამენტის შენობაში ჟურნალისტთა უფლებების დარღვევის შემთხვევებზე.