მოსკოვი და მინსკი ბელორუსის ტერიტორიაზე ტაქტიკური ბირთვული იარაღის განთავსებაზე შეთანხმდნენ.

რატომ არის მნიშვნელოვანი: ბელარუსი, უკრაინაში სრულმასშტაბიანი ომის დაწყების დღიდან რუსეთის ღია მოკავშირე და სამხედრო პოლიგონია, საიდანაც ოკუპანტები სამხედრო ტექნიკას და პერსონალს ეზიდებიან.

  • კრიტიკოსთა შეფასებით, ამჯერად ბელარუსი რუსეთის ბირთვული ტყვე ხდება, რაც ქვეყნის რუსეთზე დამოკიდებულებას კიდევ უფრო გააღრმავებს.
  • მედიაში გავრცელდა საიდუმლო დოკუმენტები, რომლის მიხედვითაც კრემლს ბელარუსის სახელმწიფოებრიობის შთანთქმის გეგმა თარიღებში აქვს გაწერილი.

შეფასებები: უკრაინის საგარეო საქმეთა სამინისტროს შეფასებით, ვლადიმერ პუტინის განცხადებები ბელორუსში ტაქტიკური ბირთვული იარაღის განლაგების შესახებ არის "კიდევ ერთი პროვოკაციული ნაბიჯი", რომელიც ძირს უთხრის ბირთვული განიარაღების მცდელობებს და "მთლიანად საერთაშორისო უსაფრთხოების სისტემას".

  • უკრაინა მოუწოდებს ბელარუსებს, აღკვეთონ ქვეყანაში ბირთვული იარაღის განლაგების კრიმინალური განზრახვების განხორციელება, რომელიც არღვევს ბირთვული იარაღის გაუვრცელებლობის შესახებ ხელშეკრულებით გათვალისწინებული ვალდებულებებს.
  • კიევმა ასევე მიმართა შვიდეულის ჯგუფს (G7) ალიანსს და ევროკავშირს, რათა გააფრთხილონ ბელარუსის ხელისუფლება "გრძელვადიანი შედეგების" შესახებ, თუ ისინი იარაღს მათ ტერიტორიაზე უმასპინძლებენ.
  • უკრაინა ელის გაერთიანებული სამეფოს, ჩინეთის, შეერთებული შტატების და საფრანგეთის პასუხს, — რომლებსაც, როგორც გაეროს უშიშროების საბჭოს მუდმივ წევრებს აქვთ "განსაკუთრებული პასუხისმგებლობა, თავიდან აიცილონ აგრესიის საფრთხე ბირთვული იარაღის გამოყენებით".
  • "ჩვენ ამ მიზნით მოვითხოვთ გაეროს უშიშროების საბჭოს საგანგებო სხდომის დაუყოვნებლივ მოწვევას“, — ნათქვამია უკრაინის საგარეო საქმეთა სამინისტროს განცხადებაში.
  • "რუსეთმა კიდევ ერთხელ დაამტკიცა თავისი მუდმივი უუნარობა იყოს ბირთვული იარაღის პასუხისმგებლობიანი მფლობელი ომის შეკავებისა და თავიდან აცილების მიზნით. მსოფლიო უნდა გაერთიანდეს მათ წინააღმდეგ, ვინც საფრთხეს უქმნის კაცობრიობის ცივილიზაციის მომავალს", — აცხადებენ სამინისტროში.