9 ივნისს, 12 საათიდან ვირსალაძისა და მტკვრის ქუჩებზე მოძრაობა შეიზღუდება. თბილისის მერიის ცნობით, პროექტ ახალი ტფილისის მეორე ეტაპის ფარგლებში, ორბელიანის მოედანზე საინჟინრო-საკომუნიკაციო ქსელების რეაბილიტაცია იწყება.

ოთხი თვის ვადაში, სამუშაოები ორბელიანის მოედნის ტერიტორიაზე შვიდ ქუჩაზე - ათონელის, ვირსალაძის, ხიდის, ფურცელაძის, ფხოვის, სობჩაკის (ყოფილი ხაზინის ქუჩა) და თაბუკაშვილის ქუჩებზე განხორციელდება.

თბილისის მერიის მტკიცებით, აღნიშნულ ქუჩებზე მთლიანად შეიცვლება წყალმომარაგების ქსელი და კანალიზაციის სისტემა. მოეწყობა ახალი სადრენაჟე სისტემა და სანიაღვრე ქსელები.

საინჟინრო-საკომუნიკაციო სამუშაოების ბიუჯეტი 8.5 მლნ ლარს შეადგენს.

პარალელურად, თბილისის განვითარების ფონდი აპირებს, ფხოვის ქუჩაზე 150-მდე ავტომანქანაზე გათვლილი მიწისქვეშა ავტოსადგომი მოაწყოს.