გუშინ, 8 ნოემბერს საქართველოს ზოგიერთ ქალაქში პირველი თოვლი მოვიდა.

რატომ არის მნიშვნელოვანი: ინტენსიური თოვისა და დაბალი ტემპერატურის გამო შიდასახელმწიფოებრივი მნიშვნელობის საავტომობილო გზის ზოგიერთ მონაკვეთზე მოძრაობა შეიზღუდა.

  • გზების ნაწილზე მოძრაობა მხოლოდ მოცურების საწინააღმდეგო ჯაჭვების გამოყენებით ან მაღალი გამავლობის ავტომობილებითაა დასაშვები.

დეტალები: თოვლმა პრობლემები შექმნა თელავში. მუნიციპალიტეტის მერიის ინფორმაციით, საზოგადოებრივი ტრანსპორტის მოძრაობა დროებით შეფერხდა.

  • მათივე განცხადებით, ამჟამად ქალაქის ყველა ცენტრალურ ქუჩაზე ტექნიკური მარილი იყრება და ტრანსპორტის მოძრაობა უმოკლეს დროში აღდგება.
  • ძლიერი თოვისა და რთული მეტეოროლოგიური პირობების გამო მოძრაობა შეზღუდულია საგარეჯოშიც.
  • ქალაქის მერიის განცხადებით, საავტომობილო გზებზე მარილი იყრება და გაწმენდითი სამუშაოები მიმდინარეობს.
  • ელექტრო ენერგიის და წყლის მიწოდება შეფერხდა ცაგერში. მერიის ინფორმაციით, ამ ეტაპზე ელექტრო ენერგია მოსახლეობას უკვე მიეწოდება, წყლის მიწოდება კი უახლოეს საათებში აღდგება.

ვაზიანი-გომბორი-თელავის საავტომობილო გზის კმ30-კმ50 (სოფ. გომბორი-შუა მთის მონასტრის გადასახვევი) მონაკვეთზე, მსუბუქი ავტოტრანსპორტის მოძრაობა დასაშვებია მხოლოდ მოცურების საწინააღმდეგო ჯაჭვების გამოყენებით.

  • ხოლო, მაღალი გამავლობის (ორი და მეტი წამყვანი ხიდის მქონე) ავტოტრანსპორტის გადაადგილება თავისუფალია.