მართლმადიდებელი ეკლესიის პატრიარქის 2023 წლის საშობაო ეპისტოლე საპატრიარქოს პრესსამსახურმა გაავრცელა.

რატომ არის მნიშვნელოვანი: ილია მეორის საშობაო და სააღდგომო ეპისტოლეები ხშირად მმართველი გუნდისგან განხილვისა და ახალი ინციიატივების წამოჭრის, საზოგადოების ნაწილისგან კი კრიტიკის მიზეზი ხდება.

• მაგალითად, 2018 წელს, როცა ილია მეორე ნარკოპოლიტიკას შეეხო, ირაკლი კობახიძემ განაცხადა, რომ პატრიარქმა ისეთ მნიშვნელოვან საკითხებზე გაამახვილა ყურადღება, რაზეც პარლამენტი მუშაობს და მისი გზავნილები აუცილებლად იქნებოდა გათვალისწინებული.
• 2019 წელს ილია მეორე იმაზე ალაპარაკდა, რომ "დიდი მცდელობაა, სიტყვის თავისუფლება დამახინჯებულად აღიქმებოდეს", რის შემდეგაც პარლამენტის მაშინდელმა თავმჯდომარემ განაცხადა, რომ "სიტყვით ძალადობა სერიოზული პრობლემაა" და აუცილებელია "შესაბამისი ზომების მიღება".
• 2019 და 2020 წლებში ილია მეორე აბორტის საკითხსაც ეხებოდა, რაც ქალთა უფლებადამცველების კრიტიკას იწვევდა.
• 2021 წელს მან კორონავირუსის პანდემიასა და მასთან ბრძოლის ხერხებზე ისაუბრა, თუმცა პრევენციისთვის დამატებითი რეკომენდაციების მიცემის ნაცვლად, მრევლს უთხრა, რომ კორონავირუსის პანდემია ღვთის ნებით მოხდა.

რა ეწერა წლევანდელ ეპისტოლეში: ილია მეორემ ყურადღება გაამახვილა ადამიანის სულზე, სინდისსა და გულზე, წმინდა წერილებიდან და ფსლამუნებიდან მონაკვეთები გააჟღერა და მოკლედ შეეხო უკრაინის ომს.

• პატრიარქის ყურადღების მიღმა დარჩა არაერთი აქტუალური მიმდინარე მოვლენა — ეპისტოლე წინა წლებთან შედარებით მოკლეა.
• "სინდისი ღვთის ხმაა. მას ვერ დაიმორჩილებ, შენი სურვილისამებრ ვერ განაწყობ, ბოლომდე ვერც აღმოფხვრი; პირიქით, თავის მყოფობას მაშინაც გვაგრძნობინებს, როდესაც ვცდილობთ, გავექცეთ, თუმცა ისეც ხდება, რომ მუდმივი უგულებელყოფით, მისი ხმა სუსტდება და აღარ გვესმის. არსებობს მდგომარეობაც, რასაც "დამწვარი სინდისი" ჰქვია და ადამიანის უმძიმეს სულიერ ცხოვრებაზე მეტყველებს", — ვკითხულობთ ეპისტოლეში.
• "და თუ თქვენ ცხოვრობთ ქრისტიანულად სადიდებლად ღვთისა და მსახურებად მოყვასისა, არა აქვს მნიშვნელობა, მეცნიერი ხარ, პოლიტიკოსი, ექიმი, მშენებელი, გლეხი, სპორტსმენი, პედაგოგი, მძღოლი, ჯარისკაცი თუ სხვა, შენი საქმიანობა ღვთისმსახურებად შეგერაცხება და ეს იქნება შენი ოქრო, გუნდრუკი და მური უფლისთვის მირთმეული და გაიხარებ ორსავ სოფელსა შინა", — აცხადებს ილია მეორე.
• იქვე პატრიარქი აღნიშნავს, რომ განსაკუთრებული მნიშვნელობა აქვს სამართლიანობისა და ერთიანობისათვის ჩვენს ზრუნვას, რადგან გეოპოლიტიკურად რთული ადგილი გვიკავია და მრავალი გამოწვევის წინაშე ვდგავართ.
• ილია მეორე ეპისტოლეში არ განიხილავს ომს, არ ახსენებს რუსების დანაშაულებს და მილოცვით შემოიფარგლება:
• "პირველ რიგში, უკრაინის ომის მძიმე შედეგებით დათრგუნულ და დაზარალებულ ბავშვებს, საერთოდ ნებისმიერ მოზარდს მინდა, მივულოცო ქრისტესშობის დიდებული ზეიმი; მივულოცო იგი ყველა ტვირთმძიმესა და მაშვრალს, რადგან ეს დღესასწაული აღმატებულია ნებისმიერ განსაცდელზე, ჰმეტობს თითოეული ჩვენგანის ტკივილს და იმედით გვავსებს".