ინფორმაციას რუსული პროპაგანდისტული მედია ავრცელებს.

რატომ არის მნიშვნელოვანი: 5 იანვარს, პატრიარქი კირილი "საშობაო ზავის" ინიციატივით გამოვიდა.

  • ოკუპანტი ქვეყნის მართლმადიდებელი ეკლესიის მეთაურმა ამჯერადაც რუსული პროპაგანდისტული გზავნილები გააჟღერა და უკრაინის წინააღმდეგ რუსეთის ომს "საშინაო კონფლიქტი" უწოდა.
  • კირილმა "კონფლიქტში ჩართულ მხარეებს" მოუწოდა, ცეცხლი შეწყვიტონ 6 იანვრის 12 საათიდან 7 იანვრის 24 საათამდე, რათა მართლმადიდებელმა ადამიანებმა შეძლონ, დაესწრონ ღვთისმსახურებას.
  • რუსეთის პატრიარქის განცხადებას უკრაინის პრეზიდენტის უფროსი მრჩეველი, მიხაილო პოდოლიაკი გამოეხმაურა და თქვა, რომ ეს "ზავი" ცინიკური ხაფანგი და პროპაგანდის ელემენტია.

დეტალები: ცეცხლის შეწყვეტის რეჟიმი სწორედ 36 საათით ამოქმედდება, როგორც ეს პატრიარქ კირილის განცხადებაში იყო ნათქვამი.

  • "მოწოდებიდან გამომდინარე, ვავალებ რუსეთის ფედერაციის თავდაცვის მინისტრს, შემოიღოს ცეცხლის შეწყვეტის რეჟიმი უკრაინაში მხარეებს შორის კონტაქტის მთელს ხაზზე, მიმდინარე წლის 6 იანვრის 12:00 საათიდან 7 იანვრის 24:00 საათამდე", — ვკითხულობთ პუტინის განკარგულებაში.

რუსეთის პატრიარქი პუტინთან დაახლოებული პირი და კრემლის პოლიტიკის გამტარებელია. მისი მტკიცებით, უკრაინაში ოკუპანტები რუსეთს იცავენ და მათ "მართლმადიდებლურ სარწმუნოებაზე დაფუძნებული შინაგანი მორალური გრძნობა ამოძრავებთ".

  • ასევე, წარსულში კირილი სიტყვით გამოვიდა რუსეთის ფედერაციის შეიარაღებული ძალების ტაძარში, სადაც შეაქო ახალგაზრდა რუსები, რომლებიც ჯარში მსახურობენ და უკრაინელებს ხოცავენ.

არქივიდან: 12 დეკემბერს უკრაინის პრეზიდენტმა რუსეთს მოუწოდა, შობის დღეს უკრაინის ტერიტორიიდან ჯარების გაყვანა დაიწყოს და ამით აგრესიაზე უარის თქმის უნარი აჩვენოს.

  • მალევე ზელენსკის პუტინის პრესმდივანმა, დიმიტრი პესკოვმა უპასუხა და თქვა, რომ ამაზე საუბარი გამორიცხულია.