დღეს გამართულ ბრიფინგზე იაშვილის ბავშვთა საავადმყოფოს დირექტორმა ქვეყანაში ეპიდემიოლოგიურ ვითარებაზე ისაუბრა.

რატომ არის მნიშვნელოვანი: გრიპის ვირუსი, რომელიც დღეს ყველაზე გავრცელებულია, ძირითადად ბავშვებში გვხვდება.

  • "გრიპი ძირითადად ბავშვებში ცირკულირებს, კორონავირუსი არ არის ბავშვების ვირუსი", — განაცხადა ჩხაიძემ.
  • გრიპის ვირუსის შემთხვევაში, 5 წლამდე ბავშვები, ორსულები და 65 წელს გადაცილებული მოსახლეობა რისკჯგუფებს წარმოადგენენ.
  • შესაბამისად, მნიშვნელოვანია ვაქცინაცია დაავადების გართულების პრევენციის მიზნით, განმარტავს იაშვილის კლინიკის დირექტორი.
  • ჩხაიძის განცხადებით, წელს ქვეყანამ სრულად აითვისა უფასო მოხმარებისთვის გაკუთვნილი 200 000 გრიპის ვაქცინა.

დეტალები: დაავადებათა კონტროლის ცენტრის მონაცემების მიხედვით, ამჟამად ქვეყანაში გავრცელებული ვირუსების 50% გრიპის ვირუსზე მოდის.

  • ხოლო გრიპის ვირუსებიდან ყველაზე დიდი რაოდენობით H3N2 ტიპის ვირუსი, ე.წ. ჰონგ-კონგის ვირუსი ცირკულირებს, რომელიც ჯამურად გავრცელებული ვირუსების 33%-ს შეადგენს.
  • "ჯამურ რაოდენობაში კორონავირუსის რაოდენობა არის დაახლოებით 10%, რაც იმას ნიშნავს, რომ 10-დან 1 შემთხვევაა კორონავირუსით ინფიცირება. კორონავირუსი არსად არ გამქრალა, მაგრამ შესაძლებელია, ის გახდეს ისეთივე სეზონური ვირუსი, როგორიც გრიპის ვირუსი", — განაცხადა იაშვილის კლინიკის დირექტორმა.
  • "თუ იქნება ქვეყანაში რესპირაციული ვირუსული ინფექციების პიკი, ეს პიკი დეკემბერ-იანვრის თვეებზე მოდის", — განაცხადა ჩხაიძემ.
  • ჩხაიძის ცნობით, თებერვლიდან სავარაუდოა შემთხვევების კლება, მაგრამ მარტის ბოლოს, აპრილის დასაწყისში მეორე პიკია მოსალოდნელი.