ახალი წლის ღამემდე რამდენიმე საათით ადრე ოკუპანტებმა უკრაინის მთელ ტერიტორიაზე ფართომასშტაბიანი იერიში მიიტანეს.

რატომ არის მნიშვნელოვანი: ნიკოლაევის რეგიონული სამხედრო ადმინისტრაციის ხელმძღვანელის, ვიტალი კიმის განცხადებით, რუსმა დამპყრობლებმა გადაწყვიტეს უკრაინისთვის საახალწლო ღამე გაეფუჭებინათ.

  • როგორც დღეს ბრიტანეთის დაზვერვაში ივარაუდეს, რუსეთი უკრაინაზე საახალწლოდ თავდასხმებს გააძლიერებს.
  • უწყებაში ამბობენ, რომ ამის მიზანი უკრაინელი ხალხის გატეხა და სადღესასწაულოდ მათი მორალის შერყევაა.
  • უკრაინის პრეზიდენტის აპარატის უფროსის, ანდრეი ერმაკის თქმით, "დამარცხებულები გააქტიურდნენ, მაგრამ ისინი თავისას მიიღებენ".

დეტალები: ოდესის ოლქის სამხედრო ადმინისტრაციის თავმჯდომარის, მაქსიმ მარჩენკომ მოსახლეობას თავშესაფრებში დარჩენისკენ მოუწოდა.

  • არსებული ინფორმაციით, ოკუპანტები ხმელნიცკს დრონებით დაესხნენ თავს — დაშავდა ორი ადამიანი.
  • ნიკოლაევის მერის თქმით, ქალაქში ძლიერი აფეთქებების ხმა ისმოდა და თავშესაფრებში დარჩენისკენ მოქალაქეებს მანაც მოუწოდა.

გარდა ამისა, დაახლოებით 14:00 საათიდან აფეთქებების ხმა ისმის კიევშიც — ინფორმაციას ადასტურებს ქალაქის მერი, ვიტალი კლიჩკო.

  • როგორც Reuters წერს, დედაქალაქში აფეთქების ხმა დაახლოებით 10-ჯერ გაისმა.
  • ამასთან, ელექტროენერგია საგანგებოდ გამოირთო ოდესისა და დნეპროპეტროვსკის ოლქებში. მიზანი ენერგეტიკული ინფრასტრუქტურის სერიოზული დაზიანების თავიდან აცილებაა, იმ შემთხვევისთვის, თუ მათ მტრის რაკეტები მოხვდებათ.
  • იმავე ზომებს მიმართეს ხარკოვში, ნიკოლაევსა და ჟიტომორშიც.