ანტიდასავლური მოძრაობა აცხადებს, რომ კანონპროექტს იანვარში დააინიცირებენ.

რატომ არის მნიშვნელოვანი: მოძრაობა ქართული ოცნების ყოფილი დეპუტატებითაა დაკომპლექტებული.

  • ისინი სისტემატურად ესხმიან თავს აშშ-ის ელჩს, კელი დეგნანს, ასევე, ავრცელებენ ნარატივებს, რომ დასავლეთს საქართველოს "ომში ჩათრევა" სურს.
  • მათ არაერთხელ გამოეხმაურა კელი დეგნანი და ხაზგასმით აღნიშნა, რომ ეს ბრალდებები ტყუილია.

ე.წ ხალხის ძალა ამბობს, რომ შეთავაზებული კანონით შეიქმნება "უცხოური გავლენის აგენტების რეესტრი". მასში რეგისტრაცია სავალდებულო იქნება "ყველა შესაბამისი NGO-სა და სხვა სუბიექტებისთვის", რომლებიც უცხოური წყაროებიდან ფინანსდებიან.

  • კერძოდ, მათთვის, რომელთა საქმიანობაც, წასულების სიტყვებით, საჯარო გადაწყვეტილებების მიღებასა და საზოგადოებრივი აზრის ფორმირებაზე ზეგავლენის მოპოვებას ისახავს მიზნად.
  • მათ "უცხოური აგენტის ცნების" შექმნაც სურთ, რომელთაც საკუთარი ფინანსური შემოსავლებისა და ხარჯების დეკლარირება დაევალებათ.
  • "გარდა ამისა, უზრუნველყოფილი იქნება სახელმწიფოს უშუალო ჩართულობა მთელ რიგ პროცესებში, რომლებიც უცხოური დაფინანსებით, ფიზიკური თუ იურიდიული პირების პრივილეგირებას ითვალისწინებს".
  • მსგავსი კანონი რუსეთში მოქმედებს და მას კრემლი კრიტიკული ორგანიზაციების შეზღუდვისთვის იყენებს, თუმცა წასულები ამტკიცებენ, რომ კანონპროექტი საუკეთესო დასავლური კანონპროექტების გათვალისწინებით მზადდება.

წასულები ამტკიცებენ, რომ მათი კანონპროექტი საქართველოს ეროვნული უსაფრთხოების უზრუნველყოფაში მნიშვნელოვან წვლილს შეიტანს.

  • ასევე, ამბობენ, რომ დაასრულეს მუშაობა კანონპროექტზე, რომელიც მედიაში "სიცრუის გავრცელების რეგლამენტაციას" ითვალისწინებს.
  • ამტკიცებენ, რომ დღეს, "მთელი რიგი NGO-ები და მედიასაშუალებები მნიშვნელოვან როლს ასრულებენ პოლიტიკური პროცესების რადიკალიზაციასა და პოლარიზაციაში.
  • "მიგვაჩნია, რომ ჩვენ მიერ მომზადებული ორივე კანონპროექტის მიღება მნიშვნელოვან წვლილს შეიტანს დეპოლარიზაციაში, რაც საქართველოს მშვიდობიანი და სტაბილური განვითარების აუცილებელი პირობაა", — დასძინა მაჭარაშვილმა.

მათი თქმით, ორივე პაკეტის მიღებაზე პრინციპული პოზიცია ექნებათ. ასევე, დაიწყებენ კონსულტაციებს, როგორც ქართულ ოცნებასთან, ასევე, "ყველა სხვა უცხოური გავლენისგან თავისუფალ და არარადიკალურ საპარლამენტო პოლიტიკურ ჯგუფთან".

  • "შეიქმნება ახალი გარანტიები, საქართველოში მშვიდობისა და სტაბილურობის შესანარჩუნებლად და ჯანსაღი პოლიტიკური სისტემის ჩამოსაყალიბებლად".