მსჯავრდებულთა ერთადგილიან საკანში მოთავსების წესი სახალხო დამცველის კონსტიტუციური სარჩელის საფუძველზე არაკონსტიტუციურად იქნა ცნობილი.

რატომ არის მნიშვნელოვანი: სახალხო დამცველის აპარატის განცხადებით, ისინი წლებია, №3 და №6 პენიტენციურ დაწესებულებებში მსჯავრდებულთა ხანგრძლივი დროით იზოლირებისა და სხვა პატიმრებთან კონტაქტის შეზღუდვის წესის შეცვლას მოითხოვდნენ.

  • პენიტენციურ დაწესებულებებში პატიმრების თვეებისა და წლების განმავლობაში იზოლაციის პრაქტიკა, სახალხო დამცველს შეფასებული აქვს, როგორც არასათანადო მოპყრობა.
  • ომბუდსმენის აპარატის განმარტებით, სამარტოო საკნებში მოთავსებულ პატიმრებს ყოველთვის განსაკუთრებული ყურადღება ეთმობოდა, რადგან ამან შესაძლოა, მნიშვნელოვანი ზიანი მიაყენოს აღნიშნული პირების ფსიქიკურ, სომატურ და სოციალურ ჯანმრთელობას.
  • აპარატის შეფასებით, პატიმრის სამარტოო საკანში გამოკეტვა, წინააღმდეგობაში მოდიოდა ღირსების უფლებასთან.

დეტალები: სასამართლოს გადაწყვეტილებით, იუსტიციის სამინისტრომ საქართველოს კონსტიტუციის მოთხოვნების შესაბამისად 2023 წლის 1 მაისამდე უნდა დაარეგულიროს ერთადგილიან საკანში პატიმრების მოთავსების პროცედურა და საფუძვლები.

  • 2022 წლის 21 დეკემბერს საქართველოს საკონსტიტუციო სასამართლოს პირველმა კოლეგიამ დააკმაყოფილა საქართველოს სახალხო დამცველის სარჩელი საქართველოს იუსტიციის მინისტრის წინააღმდეგ და გასაჩივრებული ნორმები არაკონსტიტუციურად ცნო.

საქართველოს საკონსტიტუციო სასამართლომ დაადგინა, რომ:

  • ერთადგილიან საკანში მსჯავრდებულის სასჯელის მოსახდელად განწესების დროს გადაწყვეტილება უნდა მიიღებოდეს განსაზღვრული ვადით, წერილობით და დასაბუთებულად.
  • გადაწყვეტილება სავალდებულო წესით უნდა ეფუძნებოდეს ინდივიდუალური შეფასებისა და გამოკვლევის შედეგებს და ითვალისწინებდეს პენიტენციური დაწესებულების მხრიდან მიღებული გადაწყვეტილების პერიოდული შეფასების ვალდებულებას.
  • გარდა ამისა, მსჯავრდებული უზრუნველყოფილი უნდა იყოს ქმედითი და ეფექტიანი გასაჩივრების უფლებით, რასაც სადავო ნორმებით დადგენილი წესი არ ითვალისწინებდა.