ამის შესახებ თბილისის მერმა, კახა კალაძემ თბილისის საკრებულოში წლიურ ანგარიშზე საუბრისას განაცხადა.

რატომ არის მნიშვნელოვანი: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 ბავშვი დაშავდა.

  • შადრევანი მერიამ წინა დღეს, 12 ოქტომბერს ოფიციალურად გახსნა — სარეაბილიტაციო სამუშაოებს კომპანია გრინსერვისი+ ასრულებდა.
  • მშენექსპერტი კი ის კომპანიაა, რომელსაც შადრევნისთვის უსაფრთხოების შემოწმების მიზნით ექსპერტიზა უნდა ჩაეტარებინა.
  • კომპანია ინსპექტირების შუალედურ ანგარიშში წერს, რომ სამუშაოები შესრულებულია საპროექტო-სახარჯთაღრიცხვო დოკუმენტაციის შესაბამისად და შესაბამისობაშია საქართველოში მოქმედ სამშენებლო ნორმებთან, თუმცა არ საუბრობს უსაფრთხოების საკითხზე.
  • საკითხზე მერია პასუხისმგებლობას იხსნის და აპირებს, თავიდან შემოწმდეს ყველა ის ობიექტი, რომელსაც ექსპერტიზა მშენექსპერტმა ჩაუტარა.

დეტალები: თბილისის მერის განცხადებით, ვაკის პარკის უმძიმესი ტრაგედიის შესახებ არსებულ კითხვებს პასუხი გამოძიებამ უნდა გასცეს.

  • "გულდასაწყვეტია, რომ როდესაც განსაკუთრებული ყურადღება ეთმობა უსაფრთხოებას, რამდენი პროექტიც განხორციელდა დედაქალაქის სხვადასხვა რაიონში, ერთი პრობლემაც კი არ შექმნილა, თმის ღერიც არ ჩამოვარდნია არათუ სამუშაოების დასრულების შემდეგ, არამედ სამუშაო პროცესშიც", — თქვა კალაძემ.
  • მერიაში ამბობენ, რომ მშენექსპერტის შესრულებული, დაახლოებით, 20 პროექტი უკვე განმეორებით ექსპერტიზაზეა გადაგზავნილი.
  • მათი განმარტებით, ალტერნატიული ექსპერტიზის შემდეგ მოხდება პროექტებში ყველა იმ ცვლილების გათვალისწინება, რომელსაც ექსპერტიზა შესთავაზებთ.