ამის შესახებ თბილისის მერმა, კახა კალაძემ თბილისის მთავრობის სხდომაზე ისაუბრა.

რატომ არის მნიშვნელოვანი: სარემონტო-სარეკონსტრუქციო სამუშაოების გამო მეტროსადგური 2021 წლის თებერვალში დაიკეტა. მერიაში ამბობდნენ, რომ მეტრო მგზავრებს 3 თვე ვერ მოემსახურებოდა.

• 2021 წლის დეკემბერში კი კალაძემ თქვა, რომ რეაბილიტაცია 7 თვეში დასრულდებოდა. 2022 წლის თებერვალში მერიაში აცხადებდნენ, რომ მეტრო მგზავრებს მაისიდან მოემსახურებოდა.
• უკვე 9 მაისს მერიაში თქვეს, რომ მეტროსადგურის გახსნა, შესაძლოა, კიდევ ერთი თვით გადადებულიყო, თუმცა ზუსტ თარიღს ვერ აკონკრეტებდნენ.
• 3 აგვისტოს თბილისის მერმა აღნიშნა, რომ უკვე ეშინია, თქვას დრო, თუ როდის დამთავრდება.
• პირველ ნოემბერს კი განაცხადა, რომ მეტროსადგურ გოცირიძის რეაბილიტაცია დასრულდა.

კალაძის თქმით, მერია კომპანია მამისონთან ხელშეკრულებას შეწყვეტს და მეტროსადგურ გოცირიძის ექსპლუატაციაში მისაღებ პროცედურებს თავად განახორციელებს. ამის მიზეზად მან კომპანიის უპასუხისმგებლობა დაასახელა.

• ასევე, ამბობს, რომ მეტროსადგურის სარეაბილიტაციო სამუშაოები ძალიან დიდი დაგვიანებით, მაგრამ დასრულებულია, თუ "რამდენიმე დეფექტს არ ჩავთვლით".
• "მნიშვნელოვანია ის ფაქტი, რომ კომპანია მამისონმა არ აწარმოა საჭირო დოკუმენტაცია და ჯერჯერობით შესაბამისი ექსპერტიზა არ ჩატარებულა", — თქვა კალაძემ.

დეტალები: მერმა კომპანია მამისონს "ძალიან პრობლემური და უპასუხისმგებლო" უწოდა, თქვა, რომ მათთან თანამშრომლობის გაგრძელებას საჭიროდ არ თვლიან და არც დეფექტების გამოსწორების იმედი აქვთ.

• მან ვიცე-მერსა და თბილისის სატრანსპორტო კომპანიის ხელმძღვანელს, კომპანიასთან ხელშეკრულების გაწყვეტა დაავალა და უთხრა, რომ მიიღონ შესაბამისი ზომები, რათა მამისონი ვერცერთ სატენდერო პროცედურაში ვეღარ მოხვდეს.
• "გადადგით ყველა საჭირო ნაბიჯი, რომ ეს კომპანია გაშავდეს", — თქვა მან.
• კალაძის თქმით, თანხას, რომელიც მეტროსადგურის ექსპლუატაციაში მისაღებად დაიხარჯება, დედაქალაქის მერია კომპანია მამისონს სასამართლოს გზით მოსთხოვს.

არქივიდან: სადგურის დაზიანების შესახებ დასკვნა 4 წელზე მეტია არსებობს. ექსპერტიზის დასკვნით, მეტროსადგურს არაერთი დაზიანება ჰქონდა.

• თუმცა, სატრანსპორტო კომპანიაში 2019 წელს აცხადებდნენ, რომ მეტროთი მგზავრობა "იმდენად უსაფრთხოა", რომ გამაგრებით სამუშაოებს არ გეგმავდნენ.
• სარემონტო-სარეკონსტრუქციო სამუშაოების დაწყების შემდეგ მერიამ ტენდერი არაერთხელ გამოაცხადა — მათგან რამდენიმე არ შედგა, რადგან მონაწილეობა არავინ მიიღო.
• ერთ შემთხვევაში კი მონაწილე კომპანიას დისკვალიფიკაცია მიენიჭა. პროექტის ბიუჯეტი 4 700 000 ლარია.