ინფორმაციას ოკუპირებულ რეგიონში მყოფი ჟურნალისტი და სამოქალაქო აქტივისტი თავად ავრცელებს.

რატომ არის მნიშვნელოვანი: დე ფაქტო უწყებამ მეარაყიშვილის წინააღმდეგ საქმე 2017 წლის აგვისტოში აღძრა, რის საფუძველზეც ის უკანონოდ დააპატიმრეს და გაჩხრიკეს — აქტივისტს ბრალად ედებოდა ცილისწამება პარტია ერთიანი ოსეთის წევრზე.

  • მალე თამარას ყალბი დოკუმენტების დამზადების ბრალდებაც წაუყენეს — დე ფაქტო უწყება ამტკიცებდა, რომ მეარაყიშვილმა ე.წ. პასპორტი ქართული პასპორტის შენარჩუნებით აიღო, რაც აკრძალულია.
  • მას გადაადგილების თავისუფლება წლების განმავლობაში ჰქონდა შეზღუდული.
  • 2019 წლის 10 ივლისს მეარაყიშვილს ყველა ბრალდება მოეხსნა, მათ შორის გაუქმდა გადაადგილების შეზღუდვაც, თუმცა დე-ფაქტო პროკურატურამ გადაწყვეტილება ზედა ინსტანციაში გაასაჩივრა.
  • 2020 წელს დე ფაქტო უზენაესმა სასამართლომ ცილისწამების ბრალდება მოხსნა და პროკურატურას დაავალა, ამოეღო ამასთან დაკავშირებული ეპიზოდები და დაებრუნებინა საქმე პირველ ინსტანციაში სხვა ეპიზოდების განსახილველად.
  • თუმცა დე ფაქტო პროკურატურამ აქტივისტს მოხსნილი ბრალი ხელახლა წაუყენა.

დეტალები: აქტივისტი ე.წ. უწყებიდან მიღებულ წერილს ავრცელებს, სადაც წერია, რომ დანაშაულის ნიშნების არარსებობის გამო საქმე დაიხურა და მას აქვს მორალური და მატერიალური ზიანის ანაზღაურების მოთხოვნის უფლება.

  • "ამის დამტკიცებას მივუძღვენი 6 წელი და ბრძოლაში გატარებულ არცერთ დღეს არ ვნანობ!" — წერს აქტივისტი.
  • "პროკურატურას ჩემს წინააღმდეგ ჰყავდა 30 მოწმე. ყველა ადგილობრივი. აქედან მხოლოდ ორმა — რამაზი ბედოევმა და ჯამბულ წინამძღვრიშვილმა თქვეს სასამართლოზე, რომ პროკურატურამ მათგან მოტყუებით მიიღო ხელმოწერა და ჩემთან პრეტენზიები არ აქვთ და იქვე მომიბოდიშეს ამ უსიამოვნებისთვის", — აღნიშნავს მეარაყიშვილი.