ინფორმაცია ამის შესახებ ირაკლი მილაძემ 15 დეკემბერს სოციალურ ქსელში გაავრცელა.

რატომ არის მნიშვნელოვანი: მოქალაქის თქმით, ჯერ შეამჩნია, რომ სახლთან უთვალთვალებენ, შემდეგ კი სამოქალაქო ტანსაცმელში ჩაცმულმა პოლიციელებმა დააკავეს.

  • ირაკლი მილაძე ამბობს, რომ პოლიციელებმა მას ფიზიკური და სიტყვიერი შეურაცხყოფა მიაყენეს, ტანსაცმელი გახადეს და ეს პროცესი კამერით გადაიღეს.
  • მოქალაქე ფიქრობს, რომ 5 დეკემბერს გამოქვეყნებულ ვიდეოს გამო დააკავეს, სადაც ის ხელისუფლების წარმომადგენლებთან (კახა კალაძე) ერთად, პოლიციასაც აგინებს.
  • "ჩვენ უფლებას არ მივცემთო, არც ერთ საქართველოს მოქალაქეს, პოლიციას მიაყენოს შეურაცხყოფაო. ეს იქნება პიროვნულადო, თუ სამსახურებრივი მოვალეობის შესრულებისასო, ჩვენ აუცილებლად გავცემთ ასეთ ქმედებებს პასუხსო", — უთხრა მან შაბათის ფორმულას.

დეტალები: მას შემდეგ, რაც ტელეკომპანია ფორმულამ გაავრცელა ანონსი მილაძის შესახებ მომზადებული სიუჟეტის შესახებ, სპეციალურმა საგამოძიებო სამსახურმა განცხადება გამოაქვეყნა.

  • სპეციალური საგამოძიებო სამსახურის ინფორმაციის განცხადებით, გამოძიება სისხლის სამართლის კოდექსის 333-ე მუხლის მე-3 ნაწილის "ბ" ქვეპუნქტით მიმდინარეობს, რაც ძალადობით ან იარაღის გამოყენებით მოხელის ან მასთან გათანაბრებული პირის მიერ სამსახურებრივი უფლებამოსილების გადამეტებას გულისხმობს.
  • "2022 წლის 12 დეკემბერს, შინაგან საქმეთა სამინისტროს თანამშრომლებმა ირაკლი მილაძე ადმინისტრაციული სამართალდარღვევისთვის დააკავეს. ამის შემდეგ კი იგი მოთავსებული იქნა შსს ქ. თბილისის დროებითი მოთავსების იზოლატორში, სადაც მან დაკავების შემდგომ პოლიციის თანამშრომლების მხრიდან განხორციელებულ ფიზიკურ და სიტყვიერ შეურაცხყოფასთან დაკავშირებით პრეტენზია დააფიქსირა.;
  • 2022 წლის 13 დეკემბერს, სპეციალური საგამოძიებო სამსახურის გამომძიებელი დროებითი მოთავსების იზოლატორში გასაუბრების მიზნით ირაკლი მილაძეს შეხვდა, თუმცა მან ინფორმაციის მოწოდებაზე უარი განაცხადა", — ვკითხულობთ საგამოძიებოს განცხადებაში.
  • უწყების თქმით, მომხდარ ფაქტთან დაკავშირებით საგამოძიებო და საპროცესო მოქმედებები აქტიურ რეჟიმში მიმდინარეობს — "მათ შორის საგამოძიებო ორგანო სწავლობს დაკავებული მოქალაქის გადაადგილების მარშრუტს, დაკავების გარემოებებს და აიდინტიფიცირებს გამოძიებისთვის მნიშვნელოვანი ფაქტების ამსახველ ვიდეო კამერის ჩანაწერებს".