განცხადებას, რომელიც ქართულ მედიებზე ვრცელდება, უერთდებიან მთარგმნელები და გამომცემლებიც.

რატომ არის მნიშვნელოვანი: განცხადების ხელმომწერები მიიჩნევენ, რომ სააკაშვილს საზღვარგარეთ მკურნალობის საშუალება უნდა მიეცეს.

  • ხელმომწერები მიიჩნევენ, რომ "პოლიტიკური სიმპათიების და იმის მიუხედავად, ვის მივიჩნევთ დღევანდელ სიტუაციაში დამნაშავედ, არ უნდა დავუშვათ მესამე პრეზიდენტის პატიმრობაში სიკვდილი".

დეტალები: "პოლიტიკური მოწინააღმდეგის დეჰუმანიზაცია არ არის ახალი მოვლენა საქართველოსთვის, თუმცა ისტორიული გამოცდილება გვასწავლის, რომ ამის შედეგი ძალიან მძიმე იქნება ჩვენი ქვეყნისთვის, განსაკუთრებით ახლა, ცვალებად საერთაშორისო ვითარებაში", — ნათქვამია ერთობლივ განცხადებაში.

  • "ეს უნდა მოვითხოვოთ ყველამ. ახლა ჩვენი დუმილი ნიშნავს, რომ ვერაფერი ვისწავლეთ საკუთარი მწარე გამოცდილებიდან. ახლა ჩვენი დუმილი ნიშნავს, რომ ვერ დავძლიეთ შურისძიების სურვილით გამოწვეული ქვენა გრძნობები. ახლა ჩვენი დუმილი ნიშნავს, რომ ჩვენი და ჩვენი შვილების სახელით უარს ვამბობთ ევროპულ ოჯახში წევრობასა და უკეთეს უსაფრთხო მომავალზე," — აცხადებენ ხელმომწერები.

განცხადებას ხელს აწერს ლევან ბერძენიშვილი, ნინო ხარატიშვილი, დათო ტურაშვილი, არჩილ ქიქოძე, ალეკო შუღლაძე, გვანცა ჯობავა, გაგა ნახუცრიშვილი, ნესტან ნენე კვინიკაძე, რატი ამაღლობელი, ლაშა ბუღაძე და სხვები.

  • ხელმომწერთა სრული ჩამონათვალი შეგიძლიათ იხილოთ ბმულზე.