ამის შესახებ მიხეილ სააკაშვილის ადვოკატმა ჟურნალისტებთან ისაუბრა.

რატომ არის მნიშვნელოვანი: 14 დეკემბერს პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

  • მანამდე, პენიტენციურმა სასამართლო პროცესზე სააკაშვილის დისტანციურად ჩართვაზე უარი თქვა იმ მიზეზით, რომ "მოკლებულია შესაძლებლობას, უზრუნველყოს მსჯავრდადებული სააკაშვილის ჩართვა".
  • პერსონალურ მონაცემთა დაცვის სამსახურმა ვიდეოჩანაწერების გავრცელებაზე შესწავლა დაიწყო.
  • სახალხო დამცველის აპარატის განცხადებით, კადრების გავრცელების მიმართ ლეგიტიმური მიზნის არსებობა ვერ დასტურდება.
  • შალვა ხაჭაპურიძე ყოფილი პრეზიდენტის კადრების გამოქვეყნებას მალევე გამოეხმაურა და თქვა, რომ ეს სისხლის სამართლის დანაშაულია, მოგვიანებით კი იუსტიციისა და პენიტენციური სამსახურის წინააღმდეგ საჩივრის შეტანა დააანონსა.

დეტალები: ადვოკატი სპეციალურ საგამოძიებო სამსახურს ოთხი მთავარი მოთხოვნით მიმართავს.

  • ხაჭაპურიძის თქმით, პირველი მოთხოვნა არის ის, რომ აღიძრას სისხლის სამართლის საქმე სააკაშვილის კადრების უკანონო ჩაწერა-გავრცელებაზე.
  • "მეორე, აუცილებლად უნდა აღიძრას სისხლის სამართლის საქმე, აი, ამ ფაქტებთან დაკავშირებით, რაზეც ახლა ვსაუბრობთ, პენიტენციურმა ვითომ გადავდე და მოუმზადებელი ვიყავი და მერე გაირკვა, რომ საერთოდ მოსასვლელებიც არ იყვნენ აქ, ანუ სასამართლო შეიყვანეს შეცდომაში და ეს არის დანაშაული", — ამბობს ადვოკატი.
  • მისი განცხადებით, მესამე მოთხოვნა ეხება იმ დეპუტატებსა და პოლიტიკოსებს, რომლებიც თავისი განცხადებებით ზეწოლას ახდენენ სასამართლოზე.
  • რაც შეეხება მეოთხე მოთხოვნას, ადვოკატის თქმით, მათ სთხოვეს სპეციალურ საგამოძიებო სამსახურს, რომ მიმართოს პარლამენტს და შეუჩეროს უფლება-მოსილება იუსტიციის მინისტრს, პენიტენციური სამსახურის უფროსს, პენიტენციური სამსახურის სამედიცინო დეპარტამენტის თანამშრომელს.
  • "არ არის გამორიცხული, მათ მონაწილეობა ჰქონდეთ მიღებული სააკაშვილის მოწამვლის ფაქტში", — თქვა ხაჭაპურიძემ.