ვივამედის დირექტორმა ექსპრეზიდენტის ჯანმრთელობის მდგომარეობაზე იმედის ეთერში ისაუბრა.

რატომ არის მნიშვნელოვანი: 14 დეკემბერს, მას შემდეგ, რაც ექსპრეზიდენტი საკუთარ სასამართლო პროცესზე არ ჩართეს და მიზეზად ტექნიკური პირობების არარსებობა დაასახელეს, პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

• კადრები აგვისტოდან დეკემბრის ჩათვლით თარიღდება და უხმოდ და უკონტექსტოდ არის შეკრული. 10-წუთიანი ვიდეოდან ბოლო პერიოდის კადრებს, რომლებიც სააკაშვილის ახლანდელ მდგომარეობას ასახავს, ყველაზე ნაკლები დრო, 19 წამი ეთმობა. ნაწილზე კი თარიღი საერთოდ არ ჩანს.
• ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.

ნადირაძემ წამყვანის კითხვაზე, რამდენად ხშირია სააკაშვილისგან "ეს აგრესიული ქცევა", თქვა, რომ ხშირი არაა და დასძინა:

• "იქ წინაპირობაც ის იყო, ეს სასამართლო პროცესის მცდელობა რომ იყო მასთან პალატაში, ამას მოჰყვა მისი მხრიდან ასეთი აგრესიული გამოვლინება".
• კლინიკის დირექტორის თქმით, პერსონალის მიმართ დამოკიდებულებაზე საუბარი მისგან არასწორი იქნება, რადგან "პაციენტი ყოველთვის მართალია".

დეტალები: ნადირაძის განცხადებით, ფიზიკურ შეურაცხყოფაზე უარესი ის "შეურაცხყოფების კასკადია", რასაც თანამშრომლები სააკაშვილის კლინიკაში შეყვანის დღიდან განიცდიან.

• "რომ ჩვენ ვართ ყველა მკვლელები, ჩვენ მას ვწამლავთ, ჩვენ მას ვკლავთ, ჩვენ მას ვანადგურებთ. ეს იცით რა ძნელი მოსასმენია, რომ შენ ფაშისტი ხარ".
• "მე მასთან მშვენიერი კომუნიკაცია მაქვს, რომ რა დავაშავე, თქვენ ხომ მაინც იცით, რომ ეს ასე არ არის, რატომ გვერჩიან ასე, ნუ მიაქცევ ყურადღებას იქ რას წერენო, მე არავისთვის არაფერი დამივალებიაო", — თქვა ნადირაძემ.

გარდა ამისა, ვივამედის დირექტორის თქმით, სააკაშვილის კლინიკაში მოთავსების დღიდან ექიმები კოლოსალური ზეწოლის ქვეშ იმყოფებიან. ასევე, სიცრუეს უწოდებს იმას, რომ ვივამედს დიაგნოზები არ აქვს.

• "ჩვენ შევედით წინასწარ წაგებულ ომში, იმიტომ, რომ განკურნება არის გადავადების და გათავისუფლების საწინააღმდეგო მხარეს. ამიტომ, ჩვენ, აი, რა უნდა გავაკეთოთ, რომ ეს პროცესი გადავწონოთ?!"
• "ჩვენ ვართ მარტო ამ თვალსაზრისით და გარეთ ვინც არის, ექიმი, ექსპერტი, ადვოკატი, მომხრეები, პოლიტიკური ისტებლიშმენტი ვინც მის მხარესაა, მთელი ეს ამხელა მანქანა მომართულია ჩვენკენ, რომ თქვენ ამას ვერ იზამთ, არ გამოგივათ".

ჯანმრთელობის მდგომარეობაზე ნადირაძე ამბობს, რომ უფლება არ აქვს გაასაჯაროოს დიაგნოზები და დეტალები, ამიტომ ამ საკითხზე მისთვის საუბარი რთულია.

• მისი თქმით, სააკაშვილი მცირე რაოდენობით, შერჩევითად იკვებება, აღნიშნავს, რომ იყო 1-2 პირღებინების ეპიზოდი, თუმცა "რასაც ჭამს, ირგებს".
• ასევე, დასძენს, რომ ყლაპვის ფიზიკური წინააღმდეგობა არ არსებობს, "ხოლო იმის იდენტიფიცირება ან დასკვნა, არ ჭამს თუ ვერ ჭამს, იმდენად სუბიექტური და სათუოა, ამის დამტკიცება ძალიან რთულია".
• ამასთან, აღნიშნა ისიც, რომ ინდექსი დათვალეს და ის კახექსიაში არ ჯდება.
• "კახექსიების რაღაც მარკერებია სისხლში, რომელიც ჩვენ, ასევე, გავზომეთ, გავსინჯეთ, ესენიც ნორმის ფარგლებშია. ლაბორატორიული მონაცემები კახექსიის დამადასტურებელ სურათს არ იძლევა".