დემოკრატიის კვლევის ინსტიტუტი პენიტენციური სამსახურის მიერ მიხეილ სააკაშვილის კადრების გასაჯაროებას გამოეხმაურა.

რატომ არის მნიშვნელოვანი: ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.

  • პერსონალურ მონაცემთა დაცვის სამსახურმა სააკაშვილის კადრების გავრცელებაზე შესწავლა დაიწყო.
  • ადვოკატ შალვა ხაჭაპურიძეს იუსტიციისა და პენიტენციური სამსახურის წინააღმდეგ საჩივარი შეაქვს.
  • სახალხო დამცველის აპარატის განცხადებით, არსებული მაღალი საზოგადოებრივი ინტერესის მიუხედავად, სპეციალური პენიტენციური სამსახურის ამ ეტაპზე ხელმისაწვდომი ოფიციალური განმარტების გათვალისწინებით, კადრების გავრცელების მიმართ ლეგიტიმური მიზნის არსებობა ვერ დასტურდება.

დეტალები: DRI-ის განცხადებით, სახელმწიფო პენიტენციური სამსახურის მიერ კადრების გასაჯაროების საბაბად მაღალი საზოგადოებრივი ინტერესის დასახელება ვერ იქნება ლეგიტიმური საფუძველი სააკაშვილის პერსონალური ინფორმაციის იმ მასშტაბით გავრცელების, რისი რეალური შედეგიც მისი პიროვნული ღირსების შელახვაა.

  • "ადამიანის ჯანმრთელობის შესახებ ინფორმაციის განსაკუთრებული კატეგორიის პერსონალურ მონაცემად მიჩნევის საფუძველი სწორედ იმაში მდგომარეობს, რომ ამ კატეგორიის ინფორმაციის გასაჯაროება ღირსების შემლახავი და დამამცირებელია," — ნათქვამია განცხადებაში.
  • ორგანიზაცია მოუწოდებს საქართველოს ხელისუფლებას, უარი თქვას პოლიტიკურ ოპონენტებთან ანგარიშსწორების არალეგიტიმურ და ადამიანის ღირსების შემლახველ მეთოდებზე, რაც დემოკრატიული პოლიტიკურ სისტემასთან შეუთავსებელია.
  • ასევე, გაითვალისწინოს ქართველი და უცხოელი ექიმების სამედიცინო დასკვნები და ყველა შესაბამისი ნაბიჯი მხოლოდ მიხეილ სააკაშვილის სიცოცხლის და ჯანმრთელობის დაცვის ინტერესებიდან გამომდინარე გადადგას.