რეზოლუციას ევროპარლამენტში გუშინ, 14 დეკემბერს მიიღეს, მას მხარი რეგისტრირებული ევროპარლამენტარებიდან 430-მა დაუჭირა, 52 მოწინააღმდეგე იყო, ხოლო 126-მა კი თავი შეიკავა.

რატომ არის მნიშვნელოვანი: რეზოლუციის მომხსენებელი, სვენ მიქსერი სწორედ იმ 126 დეპუტატს შორის იყო, ვინც თავი შეიკავა.

• მიქსერი სოციალისტებისა და დემოკრატების პროგრესული ალიანსის ჯგუფი წევრია, რომელიც ქართული ოცნების პარტნიორია.
• მისი თქმით, პლენარულ სხდომაზე წარდგენილმა ზოგიერთმა ცვლილებამ დაარღვია ბალანსის პრინციპი ტექსტის საბოლოო ვარიანტში.

დეტალები: აცხადებს, რომ განაგრძობს იმ ტექსტის მხარდაჭერას, რომელსაც კომპრომისული ვარიანტი ერქვა და პოლიტიკურ ჯგუფებს შორის შეთანხმების საგანი იყო ევროპარლამენტის საგარეო ურთიერთობათა კომიტეტზე.

• "ჩემი აზრით, მსჯელობის შედეგად, მაშინ მივაღწიეთ საკმაოდ კრიტიკულ, მაგრამ ამავე დროს, დაბალანსებულ ტექსტს. პლენარულ სხდომაზე წარდგენილმა ზოგიერთმა ცვლილებამ დაარღვია ბალანსის პრინციპი ტექსტის საბოლოო ვარიანტში";
• "მე დავაფიქსირე ჩემი პოზიცია ძალიან მკაფიოდ თითოეულ წარმოდგენილ ცვლილებაზე და ზოგს მხარი დავუჭირე, ზოგიერთის წინააღმდეგ წავედი და ზოგზეც თავი შევიკავე. მთლიანი ტექსტის ტონი და სულისკვეთება პლენარულ სხდომაზე წარმოდგენილმა და მიღებულმა ცვლილებებმა შეცვალა", — თქვა მიქსერმა პირველი არხის ცნობით.
• ამბობს, რომ ყველაზე გადაუდებელი საკითხია ჰუმანიტარულ ნიადაგზე პრეზიდენტ მიხეილ სააკაშვილის გათავისუფლება.
• "თუ ევროპარლამენტი ერთ დოკუმენტში მიხეილ სააკაშვილის, მთავარი ოპოზიციური პარტიის ყოფილი ლიდერის, ყოფილი პრეზიდენტის გათავისუფლებას ითხოვს და ზუსტად იგივე ტექსტი მოითხოვს და გასცემს რეკომენდაციას, რომ ბიძინა ივანიშვილს, ყოფილ პრემიერს პერსონალური სანქცია დაუწესდეს, ჩემი აზრით, ეს ართულებს მთლიან სიტუაციას, ართულებს ჩვენი მოთხოვნისა და მოწოდების გათვალისწინების პროცესს, ჩვენი, როგორც მიუკერძოებელი ფასილიტატორის როლს, რათა შევამციროთ საქართველოში პოლიტიკური პოლარიზება", — აცხადებს ის.

გარდა ამისა, მიქსერი აღნიშნავს, რომ დიდი ინვესტიცია ჩადო ტექსტის მოსამზადებლად — "ორივე მხრიდან შევხვდი ყველა პოლიტიკურ აქტორს. ვფიქრობ, ბევრი ნიუანსია გასათვალისწინებელი, თუ ჩვენ გვინდა, მივაღწიოთ შედეგს".

• "ჩვენ უნდა ვიყოთ რეზულტატზე ორიენტირებული, მომთმენი და გამოვიყენოთ დიპლომატიური ხერხები შედეგების მისაღწევად. მით უმეტეს, რომ ზოგიერთი შედეგი გადაუდებელი აუცილებლობისაა და ახლა გვჭირდება, რომ ეს შედეგი დადგეს — ეს არის სააკაშვილის გათავისუფლება, რადგან მიხეილ სააკაშვილი ამ პროცესებს ვერ დაელოდება", — ამბობს ის.

შესწორებები: რეზოლუციაში შევიდა ევროპარლამენტარ მირიამ ლექსმანის შესწორება ბიძინა ივანიშვილის სანქცირებასთან დაკავშირებით. რეზოლუციით ევროპულ საბჭოს სთხოვენ, დაუწესოს სანქციები ბიძინა ივანიშვილს. ასევე ქართული ოცნების დამფუძნებელი მოხსენიებულია ოლიგარქად.

• ასევე შევიდა კიდევ ერთი ცვლილება, რომლითაც გამოთქმულია შეშფოთება სააკაშვილის მდგომარეობასთან დაკავშირებით და მიმართავს საქართველოს პრეზიდენტს, სალომე ზურაბიშვილს გამოიყენოს თავისი "კონსტიტუციით მინიჭებული უფლებამოსილება" ამ საკითხის გადასაწყვეტად.
• ზურაბიშვილს ასევე მოუწოდებენ შეიწყალოს მთავარი არხის გენერალური დირექტორი ნიკა გვარამია.