აზერბაიჯანელი ჟურნალისტის, აფგან მუხტარლის ადვოკატმა, არჩილ ჩოფიკაშვილმა განაცხადა, რომ დღეს შსს-მ მუხტარლის ცოლ-შვილს დაცვის სპეციალური ღონისძიება შესთავაზა:

"შეიცვალა ხელისუფლების ცინიკური დამოკიდებულება, დღევანდელ შეხვედრაზე დავინახეთ გამოძიების მზაობა და უსაფრთხოების დამატებითი გარანტიები შემოგვთავაზეს".

დღეს, შინაგან საქმეთა სამინისტროში, მინისტრის მოადგილე შალვა ხუციშვილი აფგან მუხთარლის ცოლს, ლეილა მუსტაფაევას და მის ადვოკატს შალვა ჩოფიკაშვილს შეხვდა. მანამდე, ლეილა მუსტაფაევა პოლიციაში კიდევ ერთხელ გამოიკითხა აფგან მუხთარლის საქმეზე.

პრემიერმა გიორგი კვირიკაშვილმა დღეს, საგანგებო განცხადება გამოაქვეყნა, სადაც მან საქართველოს პრეზიდენტს, სთხოვა შექმნილი ვითარებიდან გამომდინარე, გამონაკლისის სახით, მოკლე ვადაში მიანიჭოს აფგან მუხტარლის ცოლსა და შვილებს საქართველოს მოქალაქეობა.

ლეილა მუსტაფაევამ On.ge-ის განუცხადა, რომ მას არ სჭირდება საქართველოს მოქალაქეობა და პრემიერის შეთავაზებაზე უარს ამბობს. ადვოკატმა განმარტა, რომ საქართველოს მოქალაქეობის საკითხი აფგან მუხტარლის საქმესთან კავშირში არ არის.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.