ანაკლიის კონსორციუმმა (ADC-მ) ღარიბაშვილის საპასუხო განცხადება დღეს გაავრცელა.

რატომ არის მნიშვნელოვანი: 12 დეკემბერს, მთავრობის სხდომაზე პრემიერმინისტრმა, ირაკლი ღარიბაშვილმა თქვა, რომ ანაკლიის პორტი სახელმწიფოს თანამონაწილეობით აშენდება და 51%-იანი წილის მფლობელი სახელმწიფო იქნება.

• ღარიბაშვილმა ისაუბრა ანაკლიის განვითარების კონსორციუმზე და მას ე.წ. ინვესტორი უწოდა, რომელსაც ანაკლიის პორტი უნდა აეშენებინა.
• თქვა, რომ მამუკა ხაზარაძესა და ბადრი ჯაფარიძეს მხოლოდ 3 მილიონი დოლარი აქვთ დახარჯული, ინვესტორებისგან კი მოზიდული ჰქონდათ 20-25 მლნ.

დეტალები: კონსორციუმის შეფასებით, ღარიბაშვილმა ანაკლიის პორტის პროექტზე არაერთი მცდარი ინფორმაცია გაავრცელა და მის შემოთავაზებულ გეგმას "წარმატება არ უწერია".

• "გვინდა პრემიერ-მინისტრს შევახსენოთ, რომ ანაკლიის განვითარების კონსორციუმსა და საქართველოს მთავრობას შორის მიმდინარეობს საარბიტრაჟო დავა ჟენევის საერთაშორისო სავაჭრო პალატაში. მას მოუწევს პასუხისგება დღეს გაკეთებულ ყველა ცრუ განცხადებაზე", — ნათქვამია წერილში.
• კონსორციუმი ღარიბაშვილის გამოსვლიდან შეცდომაში შემყვან პუნქტებს გამოყოფს, რომელთაც დრამატულად მცდარს უწოდებს.

ეს პუნქტებია: მოსაზრება, რომ ქართულმა სახელმწიფომ შეიძლება მოძებნოს სერიოზული კერძო ინვესტორი ანაკლიის პორტისთვის, მაშინ როცა გეგმავს პროექტში 51%-იანი საკონტროლო ინტერესის აღებას.

• კონსორციუმის მტკიცებით, არცერთი სერიოზული ინვესტორი, არცერთი საერთაშორისო ფინანსური ინსტიტუტი არ მიიღებს მონაწილეობას და არ გასცემს სესხს მსხვილ პროექტში, თუ მას უმრავლესობით აკონტროლებს სახელმწიფო.
• "მით უმეტეს, თუ გავითვალისწინებთ საქართველოს სახელმწიფოს, როგორც პარტნიორის არაერთ ბიზნეს საქმეში დემონსტრირებულ არასანდოობას", — ვკითხულობთ განცხადებაში.
• გარდა ამისა, კონსორციუმს დაუჯერებლად მიაჩნია, რომ მთავრობა 300 მილიონი აშშ დოლარის ინვესტიციას განახორციელებს ანაკლიის პორტის პროექტში, მაშინ როდესაც "მან უარი თქვა 50 მილიონი დოლარის გარანტიის სახით გაცემაზეც კი, რომ ხელი შეეწყო ADC-თვის პორტის ასაშენებლად საჭირო დაფინანსების მოპოვებაში".
• "ანაკლიის ტრაგედიაზე, და აქ განსაკუთრებით იგულისხმება უმუშევრად, დამსხვრეული იმედებით და ეკოლოგიური კატასტროფის წინაშე დარჩენილი ანაკლიელების ტრაგედია, პასუხისმგებელია სახელმწიფო, რომელმაც შეაჩერა და არ მისცა საშუალება ADC-ს, რომ დაესრულებინა დაწყებული პროექტი", — წერს კონსორციუმი.

მათივე განცხადებით, მცდარია ღარიბაშვილის ის განცხადებაც, რომ პროექტში ხაზარაძე-ჯაფარიძის ინვესტიცია მხოლოდ $3 მილიონი იყო:

• "როგორც ეკონომიკისა და მდგრადი განვითარების სამინისტროს აუდიტმა დაადასტურა, ADC-ის ინვესტიციის ოდენობამ შეადგინა $75 მილიონი (და მეტი), საიდანაც $40 მილიონი იყო ხაზარაძის და ჯაფარიძის მიერ ინვესტირებული".

არქივიდან: ანაკლიის პორტის სამომავლო განხორციელებაზე კითხვები თიბისი ბანკის საქმემ გააჩინა. თიბისი ჰოლდინგი საქართველო ანაკლიის განვითარების კონსორციუმის წევრია.

• მას შემდეგ, რაც პროკურატურამ ფულის გათეთრების ბრალდებით გამოძიება დაიწყო, თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული.
• მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში კი განაცხადეს, რომ ხაზარაძის წასვლას მიესალმებიან. მათი თქმით, ეს ბანკის გამჭვირვალობაზე დადებითად აისახება.
• მოგვიანებით ისინი ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტებიდანაც წავიდნენ.
• 12 იანვარს სასამართლო ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ.