უკრაინის პრეზიდენტმა, ვოლოდიმირზელენსკიმ დიდ შვიდეულს მხარდაჭერისთვის მადლობა გადაუხადა.

რატომ არის მნიშვნელოვანი: დიდი შვიდეული წამყვანი ეკონომიკის ქვეყნების არაფორმალური გაერთიანებაა, რომელიც ყოველწლიურ სამიტზე ეკონომიკურ და საერთაშორისო საკითხებს განიხილავს.

  • სამიტზე უკრაინის პრეზიდენტი, ვოლოდიმირ ზელენსკი ვიდეოზარით ჩაერთო და სამი ნაბიჯი დაასახელა, რომელიც მშვიდობას დააჩქარებს.
  • ზელენსკის განცხადებით, რუსეთი აგრძელებს აგრესიას და ამიტომ უკრაინის მხარდაჭერა უნდა გაგრძელდეს.

პირველი: ესაა ახალი იარაღი. ზელენსკის თქმით, უკრაინას სჭირდება თანამედროვე ტანკები, მუდმივი საარტილერიო მხარდაჭერა იარაღითა და ჭურვებით.

  • "ჩვენ გვჭირდება მეტი სარაკეტო არტილერია და მეტი დისტანციური რაკეტა. რაც უფრო ეფექტური ვიქნებით ასეთი იარაღით, მით უფრო მოკლე იქნება რუსული აგრესია".

მეორე: უკრაინის პრეზიდენტი აცხადებს, რომ მომავალ წელს ფინანსური, ენერგეტიკული და სოციალური სტაბილურობა უნდა შეინარჩუნონ.

  • "ამაში არ წაგება ყველაფერში მოგებაა", — აღნიშნა ზელენსკიმ.

მესამე: ესაა ახალი დიპლომატია. ზელენსკის განცხადებით, უკრაინა ყოველთვის ხელმძღვანელობდა მოლაპარაკებების პროცესს და ყველაფერს აკეთებდა რუსული აგრესიის შესაჩერებლად.

  • "ახლა კი ჩვენ ვგრძნობთ შესაძლებლობას, გამოვიყენოთ დიპლომატია მთელი ჩვენი ხალხისა და ჩვენი ტერიტორიის განთავისუფლებისთვის", — თქვა მან.