დღეს, 11 დეკემბერს, პოლიტსაბჭოს სხდომის დასრულების შემდეგ, კობა ნაყოფიამ თქვა, რომ თავმჯდომარის არჩევნები 28-29 იანვარს ბლოკჩეინის სისტემით ჩატარდება.

რატომ არის მნიშვნელოვანი: ერთიანი ნაციონალური მოძრაობის წევრთა ნაწილმა 9 ნოემბერს შიდაპარტიული არჩევნები, მათ შორის, ახალი თავმჯდომარის არჩევა მითხოვა.

  • იმავე დღეს, ნიკა მელიამ ბრიფინგი გამართა და თქვა, რომ არჩევნების ჩასატარებლად მზადაა, თუმცა პარტიელები ნაჩქარევი გადაწყვეტილების მიღებაში დაადანაშაულა.
  • არჩევნებში საკუთარი კანდიდატურები დააყენეს გიორგი ჩალაძემ და გიორგი მუმლაძემაც.
  • 10 ნოემბერს ლევან ხაბეიშვილმა თქვა, რომ პროცესში არ ჩაერთვებოდა, თუმცა 16 ნოემბერს გადაიფიქრა, თავისი კანდიდატურა დააყენა და გამოვიდა ინიციატივით, რომ მიხეილ სააკაშვილის მდგომარეობასთან დაკავშირებით შეიქმნას შტაბი, რომელსაც გიორგი ჩალაძე უხელმძღვანელებს, რის შემდეგაც ჩალაძემ კანდიდატურა მოხსნა.

ნაყოფიას თქმით, ბლოკჩეინ სისტემით არჩევნების ჩატარებას 69 მომხრე და 1 მოწინააღმდეგე ჰყავდა.

  • მისივე განცხადებით, ეს სისტემა პარტიაში ნიკა მელიას ჯგუფმა წარმოადგინა.

დეტალები: როგორც ენმ-ს სოციალური მედიის მენეჯერი, გიორგი ქართველიშვილი მთავარ არხთან განმარტავს, ბლოკჩეინ სისტემა ფარული კენჭისყრის საშუალებას იძლევა.

  • გარდა ამისა, როგორც პარტიაში ამბობენ, მეთოდი გამორიცხავს ერთი ამომრჩევლის მიერ ხმის რამდენჯერმე მიცემასა და არჩევნებში ტროლ-ბოტების მონაწილეობას.
  • "ეს არის ყველაზე მარტივი გზა, რომ მისცენ ხმა ამ გზით და მისი ხმა რომ არ გაყალბდება და მისი გაყალბება რომ შეუძლებელია ამ სისტემის დახმარებით, ეს უზრუნველყოფს ამ ყველაფერს.
  • ყველაზე მთავარი მოთხოვნა არის, რომ ჰქონდეს ფეისბუკი, აკეთებს ავტორიზებას ფეისბუკით, მხოლოდ ერთადერთი თანხმობით გადადის ყველაზე მთავარ ნაბიჯზე, სადაც თვითონ წერს პირად ნომერს, მის მობილურ ნომერს და მობილური ნომრიდან მიღებულ საიდენტიფიკაციო კოდს ადასტურებს ველში. ეს არის სრულიად უმარტივესი ორი ნაბიჯი, რომელსაც აკეთებს მომხმარებელი", — ამბობს ქართველიშვილი.