პარტიის წარმომადგენლების განცხადებით, არჩევნები 28-29 იანვარს ჩატარდება.

რატომ არის მნიშვნელოვანი: ერთიანი ნაციონალური მოძრაობის წევრთა ნაწილმა 9 ნოემბერს შიდაპარტიული არჩევნები, მათ შორის, ახალი თავმჯდომარის არჩევა მითხოვა.

• იმავე დღეს, ნიკა მელიამ ბრიფინგი გამართა და თქვა, რომ არჩევნების ჩასატარებლად მზადაა, თუმცა პარტიელები ნაჩქარევი გადაწყვეტილების მიღებაში დაადანაშაულა.
• არჩევნებში საკუთარი კანდიდატურები დააყენეს გიორგი ჩალაძემ და გიორგი მუმლაძემაც.
• 10 ნოემბერს ლევან ხაბეიშვილმა თქვა, რომ პროცესში არ ჩაერთვებოდა, თუმცა 16 ნოემბერს გადაიფიქრა, თავისი კანდიდატურა დააყენა და გამოვიდა ინიციატივით, რომ მიხეილ სააკაშვილის მდგომარეობასთან დაკავშირებით შეიქმნას შტაბი, რომელსაც გიორგი ჩალაძე უხელმძღვანელებს. რის შემდეგაც ჩალაძემ კანდიდატურა მოხსნა.

დეტალები: პოლიტსაბჭოს თავმჯდომარემ, კობა ნაყოფიამ შეხვედრის დასრულების შემდეგ განაცხადა, რომ სხდომა კონსტრუქციულ და მშვიდ ვითარებაში ჩატარდა.

• "ჩვენი მთავარი საკითხი, მთავარი საზრუნავი დღეს, უმთავრესი, ეს არის მიხეილ სააკაშვილის ჯანმრთელობის მდგომარეობა და მისი თავისუფლება. ამაზე ვიმსჯელეთ ბევრი, ვიმსჯელეთ სამოქმედო გეგმაზე, რა სამოქმედო გეგმით ვხვდებით სასამართლო პროცესებს", — თქვა ნაყოფიამ.
• მისივე განცხადებით, პარტიაში არჩევნები ბლოკჩეინ სისტემით ჩატარდება.
• "კანდიდატების წარმომადგენლებმა შემოიტანეს ორი პროექტი, ერთი პროექტი გულისხმობდა ელექტრონულ კენჭისყრას, საუბარი იყო ფეისბუკით კენჭისყრაზე, მეორე იყო ბლოკჩეინის პლატფორმაზე, მაგრამ მეორე მხარემ დაუჭირა მხარი ბლოკჩეინს. 1 ხმა იყო წინააღმდეგი, 69-მ მისცა ხმა. [...]
• იქნა მიღებული გადაწყვეტილება ბლოკჩეინის სასარგებლოდ, რომელიც წარმოადგინა ნიკა მელიას ჯგუფმა", — ამბობს ნაყოფია.

ნიკა მელიას განცხადებით, პარტიამ კრიტიკულ ვითარებაში უპრეცედენტო ერთობის უნარი გამოავლინა.

• "მოხარული ვარ, რომ იმ პოლიტიკური საბჭოს წევრებმა, რომლებიც არიან ამ წუთას, დღემდე იყვნენ სხვა პოზიციაზე, შეიცვალეს დამოკიდებულება რიგ საკითხებზე, მათ ეს ეტყობათ რიტორიკაში, მივესალმები კიდევაც, კარგი იქნებოდა, აქამდეც მოგვეხერხებინა", — ამბობს თავმჯდომარეობის კანდიდატი.
• მელიას განცხადებით, პარტიისთვის მთავარი საკითხი ახლა მიხეილ სააკაშვილის ჯანმრთელობის მდგომარეობაა.
• "პირველ რიგში, მწვავე და აქტუალური საკითხი გახლავთ მიხეილ სააკაშვილის ჯანმრთელობის მდგომარეობა და კარს მომდგარი სასამართლო პროცესები, როდესაც ჩვენ, მთელი ენმ, მისი ამომრჩევლები, მხარდამჭერები და არა მხოლოდ ამ პარტიის ამომრჩევლები და მხარდამჭერები, უბრალოდ ადამიანები, დარწმუნებული ვარ, ვინც მხარს არ უჭერს ადამიანის სიკვდილს ტყვეობაში, ვიქნებით მობილიზებულნი გადამწყვეტი დღისთვის, როდესაც იქნება განაჩენის გამოტანის თარიღი, გავერთიანდებით", — თქვა მან.

ლევან ხაბეიშვილი, ენმ-ს თავმჯდომარეობის კიდევ ერთი კანდიდატი, ამბობს, რომ მთავარი საკითხები სააკაშვილის ჯანმრთელობის მდგომარეობა და "რუსი ოლიგარქის" წინააღმდეგ ბრძოლა.

• "წარმოდგენილ თარიღს დავეთანხმეთ ერთხმად, მათსავე წარმოდგენილ ვერსიას დავეთანხმეთ. მარტივი მიზეზები აქვს ამას, პარტიაში შარზე არავინ არ არის. პარტიას სჭირდება გაძლიერება, სტაბილურობა და შესაბამისად, ეს ტურბულენცია უნდა მორჩეს სწრაფად", — განაცხადა ხაბეიშვილმა.