ინფორმაცია სოციალურ ქსელში გავრცელდა და მერიამ დაადასტურა.

რატომ არის მნიშვნელოვანი: ნაძვის ხის ინსტალაციის ჯებირებზე დამაგრებული დაღუპულთა ფოტოები და შავი ლენტები ერთდროულად სოლიდარობის, პატივისცემისა და პროტესტის სიმბოლო იყო.

  • პროტესტი კი მერიის გადაწყვეტილებას მოჰყვა, წელს საახალწლო სლოგანად მშვიდობის ქალაქი აერჩიათ.
  • მოქალაქეები აცხადებენ, რომ 20%-იანი ოკუპაციის, მეგობარ ქვეყანაში ომისა და იქ ჩვენი მოქალაქეების დაღუპვის ფონზე ეს სლოგანი ცინიკური და შეუფერებელია.
  • დაღუპულთა ფოტოების გამოფენით, სახელმწიფო შენობებზე სიმბოლურად დროშების დაშვებით და სხვა პერფორმანსებით აქტივისტებმა პატივი მიაგეს მათ ხსოვნას და გააპროტესტეს ის, რომ მთავრობას შესაბამისი არც რეაგირება ჰქონდა და არც განცხადებები.
თავისუფლების მოედანი რამდენიმე დღის წინ და დღეს

თავისუფლების მოედანი რამდენიმე დღის წინ და დღეს

ფოტო: მარიამ შუშანია/FB / დავით კორკოტაძე/On.ge

დეტალები: მერიაში ამბობენ, რომ გარდაცვლილი მეომრების ფოტოები აიღეს და დროებით გმირთა მოედანზე, საქართველოს ტერიტორიული მთლიანობისთვის ბრძოლაში დაღუპულ გმირთა მემორიალთან გადაიტანეს, რადგან "საახალწლო დღესასწაულისთვის განკუთვნილ სივრცეში იყო განთავსებული".

  • "ახალ წელს ხვდებიან და ქალაქებს ნაძვის ხეებით რთავენ საომარ მდგომარეობაში მყოფ უკრაინაშიც კი. ამ ფონზე, ცალკეული პოლიტიკოსების მცდელობა, თბილისელებს წაართვან ახალი წელი, ნაძვის ხეს შემოავლონ შავი ლენტები და დაღუპული მებრძოლების ფოტოსურათები განათავსონ სადღესასწაულო სივრცეში, არანაირ მორალურ ჩარჩოში არ ჯდება", — წერს მერია და ამბობს, რომ გადატანაზე გადაწყვეტილებაც ამიტომ მიიღეს.
  • "ამით, პირველ რიგში, პატივს მივაგებთ დაღუპულთა ხსოვნას და თბილისელებსაც მიეცემათ ახალი წლის სათანადოდ აღნიშვნის შესაძლებლობა. ახალ წელს სიხარულით ელის ყველა, განსაკუთრებით, პატარები. დედაქალაქის მთავარი ნაძვის ხე და რუსთაველის გამზირი უნდა იყოს ადგილი, სადაც ადამიანები ახალ წელს ბედნიერებას და სიხარულს დაიბედებენ", — აცხადებს უწყება.
გმირთა მოედანზე გადატანილი ფოტოები

გმირთა მოედანზე გადატანილი ფოტოები

ფოტო: თბილისის მერია