გია ბუღაძემ ამის შესახებ On.ge-ს განუცხადა. თბილისის სახელმწიფო უნივერსიტეტში კი გვითხრეს, რომ ინფორმაცია სიმართლეს არ შეესაბამება და ხელშეკრულებას ხელი თავად ლექტორმა არ მოაწერა.

რატომ არის მნიშვნელოვანი: ბუღაძე თბილისის სახელმწიფო უნივერსიტეტში 16 წელია ასწავლის.

  • "სამი თქვე თითქმის, ვიმუშავე და მივხვდი, რომ აღარ დებენ ხელშეკრულებას. იმასაც მივხვდი, რომ ახალი ხელმძღვანელობა ჰყავთ, რომელიც უფრო გამოკვეთილად "ქოცია" და მივხვდი, რომ ჩემი გაგდება უნდათ. კი ბატონო, რაზეა ლაპარაკი, როდის იყო, რამეზე მიჭიდავია", — გვითხრა ბუღაძემ.
  • აცხადებს, რომ ბავშვები შეწუხდნენ, თუმცა თვითონ ვერაფერს მოიმოქმედებდა: "კიდევ ერთი ნიშანია, რა დღეშია საწყალი უნივერსიტეტი, კიდევ ერთხელ ვიგრძენი".

დეტალები: როგორც On.ge-ს თსუ-ის სოციალურ და პოლიტიკურ მეცნიერებათა ფაკულტეტის დეკანმა თამარ დოლბაიამ უთხრა ახალი ხელშეკრულების მიხედვით, ბუღაძეს საათობრივად 60 ლარი შესთავაზეს, რაზეც უარი თქვა და ხელი არ მოაწერა.

  • დოლბაიას განცხადებით, ხელშეკრულება ყოველ სემესტრში თავიდან იდება და როდესაც ახალი სემესტრი დაიწყო, გია ბუღაძე მხოლოდ ნოემბერში მივიდა ხელშეკრულების გასაფორმებლად, სადაც ახალი პირობები გააცნეს.
  • "ეს თანხა არის ფაკულტეტზე მოწვეულებს სულ რამდენიმეს აქვს. ჩვენს პირობებში კარგი ტარიფია. საერთოდ მოწვეულებს 25-30, ნუ რაღაც შემთხვევებში 35 აქვთ. მაგრამ მანამდე სხვა სისტემა იყო და მოჭრილი თანხა ეძლეოდა და განსხვავება გამოდის 120 ლარი";
  • დოლბაიას თქმით, ერთი თვეა დარჩენილი სასწავლო წლის ბოლომდე და თავად აღარ ისურვა გაგრძელება — "სტუდენტებისთვის პრობლემა რომ არ შექმნილიყო, ეს 5 კრედიტი ჰაერში არ გამოკიდებულიყო სხვა წაიკითხავს ამ საათებს, სემინარის ლექტორი";
  • სოციალურ და პოლიტიკურ მეცნიერებათა ფაკულტეტის დეკანი ამბობს, რომ უნივერსიტეტს ბუღაძე არ გაუშვია — "პატივს რომ არ ვცემდეთ ბატონ გიას, მის შემოქმედებას, მის პიროვნებას 60 ლარს არ შევთავაზებდით".