ამ თემაზე საფრანგეთის პრეზიდენტმა ფრანგულ ტელევიზიასთან ისაუბრა.

რატომ არის მნიშვნელოვანი: უსაფრთხოების გარანტიებს ჯერ კიდევ ომის დაწყებამდე და დაწყების შემდეგაც უკრაინა ითხოვდა, რომელიც სამხედრო აგრესიის მსხვერპლია.

  • რუსეთი კი არაპროვოცირებულ აგრესიას სწორედ მათი უსაფრთხოების საფრთხის ქვეშ დადგომით და ნატოს გაფართოების შიშით "ამართლებდა".
  • ამავდროულად, საფრანგეთი მზაობას გამოხატავდა, რომ ომის შემდეგ უკრაინის უსაფრთხოების გარანტიები უზრუნველეყო.
  • რაც შეეხება მოლაპარაკებებს, ამ იდეას საფრანგეთის პრეზიდენტი ძველი მოლაპარაკებების ჩაშლის შემდეგ ხშირად ატარებს, მაგრამ უკრაინა ენთუზიაზმით არ ხვდება.
  • ვოლოდიმირ ზელენსკი ომის დაწყების დღიდან იმეორებდა, რომ მზად არის რუს კოლეგასთან მოლაპარაკებებისთვის, თუმცა 4 რეგიონის ანექსიის შემდეგ, მან ხელი მოაწერა ეროვნული უსაფრთხოებისა და თავდაცვის საბჭოს გადაწყვეტილებას და კონკრეტულად ვლადიმერ პუტინთან მოლაპარაკებები ოფიციალურად გამორიცხა.

რა თქვა მაკრონმა: საფრანგეთის პრეზიდენტმა განაცხადა, რომ დასავლეთმა უნდა განიხილოს, როგორ დააკმაყოფილებს რუსეთის საჭიროებას უსაფრთხოების გარანტიებზე, თუ ვლადიმერ პუტინი დათანხმდება მოლაპარაკებებს უკრაინაში ომის დასასრულებლად.

  • "ეს ნიშნავს, რომ ერთ-ერთი მნიშვნელოვანი საკითხი, რომელიც ჩვენ უნდა გადავწყვიტოთ — როგორც პრეზიდენტი პუტინი ყოველთვის ამბობდა — არის შიში იმისა, რომ ნატო უახლოვდება მათ კარებს და განლაგდება იარაღი, რომელიც შეიძლება დაემუქროს რუსეთს", — განაცხადა მან.
  • "ეს იქნება მშვიდობის თემის ნაწილი, ამიტომ ჩვენ უნდა მოვამზადოთ რისი გაკეთებაც შეგვიძლია — როგორ დავიცვათ ჩვენი მოკავშირეები და წევრი ქვეყნები და როგორ მივცეთ გარანტიები რუსეთს მოლაპარაკებების მაგიდასთან დაბრუნების დღეს", — განმარტა საფრანგეთის პრეზიდენტმა.

რა უპასუხა არახამიამ: ხალხის მსახურის ფრაქციის თავმჯდომარე და რუსეთ-უკრაინის მოლაპარაკებების ჯგუფის ხელმძღვანელი აცხადებს, რომ უკრაინა მზად არის უზრუნველყოს რუსეთისთვის უსაფრთხოების გარანტიები და ამისთვის საკმარისია:

  • დატოვონ მათი ქვეყნის ტერიტორია;
  • გადაიხადონ რეპარაცია;
  • დაისაჯოს ომის ყველა დამნაშავე;
  • ნებაყოფლობით დათმონ ბირთვული იარაღი.
  • არახამიას თქმით, ამის შემდეგ მზად არიან, რომ მოლაპარაკების მაგიდასთან დასხდნენ და უსაფრთხოების გარანტიებზე ისაუბრონ.