"დღეს ხუთი ქართველი დაიღუპა ბახმუტთან ბრძოლაში. ამ მძიმე წუთებში, ვუსამძიმრებ უკრაინაში დაღუპული ყველა ქართველი მებრძოლის ოჯახებს, მეგობრებსა და ახლობლებს", — წერს სალომე ზურაბიშვილი ფეისუბქზე.

რა მოხდა: ბახმუტში მძიმე ბრძოლები მიმდინარეობს და ამ ეტაპზე ფრონტის ყველაზე ცხელი წერტილი სწორედ იქ არის.

  • დღეს ქართველმა სამხედროებმა გაავრცელეს ინფორმაცია ბახმუტთან 5 ქართველის დაღუპვის შესახებ, რაც მოგვიანებით საგარეო საქმეთა სამინისტრომ დაადასტურა.
  • ვრცელდება ინფორმაცია მე-6 დაღუპულზეც, თუმცა ჯერ ოფიციალურად არ დადასტურებულა.
  • სახელისუფლებო გუნდიდან ჯერ არავინ გამოხმაურებია საქართველოს მოქალაქეების დაღუპვას.

დეტალები: მებრძოლი, რომეო ფარულავა მთავარ არხთან ამბობს, რომ ქართული დანაყოფის წევრები მზად არიან, შეუერთდნენ უკრაინულ ძალებს და დაღუპულთა ცხედრების გამოსვენებისა და ალყაში მოხვედრილების გამოყვანის ოპერაციაში ჩაერთონ.

  • მისივე თქმით, დაჭრილია მეთაური ზ.მ. და დანარჩენი ქართველი მებრძოლები უკრაინელებთან ერთად არიან ალყაში.
  • "ქართული პარტიზანების მეთაური იქ არის, გველოდება და ყველაფერს აკეთებს იმის გულისთვის, რომ ჩვენი ბიჭები, ვინც ცოცხლები არიან, გადმოიყვანოს აქეთ", — განაცხადა კიდევ ერთმა ქართველმა მებრძოლმა და აღნიშნა, რომ ისინიც მათთან შესაერთებლად მიდიან.

ომის დაწყებიდან დღემდე ოკუპანტებთან ბრძოლაში უკვე 33 ქართველი მებრძოლი დაიღუპა.

  • დღეს, 3 დეკემბერს კიევში ტაძარში პატივი მიაგეს რამდენიმე დღის წინ დაღუპულ ჯარისკაცს, ჯამბულათ ხოფერიას.