ევროკავშირის ქვეყნები ერთი ბარელი რუსული ნავთობის 60 დოლარად შესყიდვის ზღვარზე შეთანხმდნენ.

რატომ არის მნიშვნელოვანი: ფასის ლიმიტი, რომელიც G7-ს ქვეყნების იდეაა, მიზნად ისახავს რუსეთის შემოსავლის შემცირებას ნავთობის გაყიდვიდან.

  • 5 დეკემბერი არის ბოლო ვადა ევროკავშირის ქვეყნებისთვის, რათა ეტაპობრივად შეწყვიტონ რუსული საზღვაო ნავთობის იმპორტი, შესაბამისად ზედა ზღვრის მიზანი ასევე ფასების ზრდის თავიდან აცილებაცაა.
  • რუსეთმა აქამდე არაერთხელ დაგმო ნავთობზე ფასის ზედა ზღვრის დაწესება და თქვა, რომ ის არ მიაწოდებს ნავთობს ქვეყნებს, რომლებმაც დააწესეს ფასების ლიმიტი.

დეტალები: როგორც ევრონიუსი წერს, ქვეყნებმა რამდენიმე დღე გაატარეს ინტენსიურ დებატებში იმის შესახებ, თუ რამდენად მაღალი ან დაბალი უნდა იყოს ფასების ზღვარი.

  • პოლონეთი და ბალტიის ქვეყნებდი ითხოვდნენ გაცილებიით დაბალ ზღვარს, 30 დოლარს, ხოლო საბერძნეთი, კვიპროსი და მალტა 70 დოლარს;
  • საბოლოო შეთანხმებას მიაღწიეს დღეს, 2 დეკემბერს, მას შემდეგ, რაც პოლონეთი დათანხმდა 60 დოლარიანი ზღვრის დაწესებას.
  • "ეს დაგვეხმარება ენერგიის გლობალური ფასების სტაბილიზაციაში, რაც სარგებელს მოუტანს განვითარებად ეკონომიკებს მთელს მსოფლიოში", — თქვა ევროკომისიის პრეზიდენტმა ურსულა ფონ დერ ლაინემა.

კონტექსტი: ერთი ბარელი რუსული ნავთობის ფასი გაიზარდა მას შემდეგ, რაც რუსეთმა თებერვალში დაიწყო უკრაინაში შეჭრა.

  • რუსეთის ნავთობის ფასებზე ლიმიტის შემოღება ნიშნავს იმას, რომ ქვეყნებს მხოლოდ საზღვაო ტრანსპორტით გადატანილი ნავთობისა და ნავთობპროდუქტების შესყიდვის უფლება ექნებათ, რომლებიც გაიყიდება დადგენილი ფასის პირობით.