ამის შესახებ ერთიანი ნაციონალური მოძრაობის პოლიტსაბჭოს თავმჯდომარემ ჟურნალისტებთან ისაუბრა.

რატომ არის მნიშვნელოვანი: ერთიანი ნაციონალური მოძრაობის წევრთა ნაწილმა 9 ნოემბერს შიდაპარტიული არჩევნები, მათ შორის, ახალი თავმჯდომარის არჩევა მითხოვა.

  • იმავე დღეს, ნიკა მელიამ ბრიფინგი გამართა და თქვა, რომ არჩევნების ჩასატარებლად მზადაა, თუმცა პარტიელები "ნაჩქარევი გადაწყვეტილების მიღებაში" დაადანაშაულა.
  • არჩევნებში საკუთარი კანდიდატურები დააყენეს გიორგი ჩალაძემ და გიორგი მუმლაძემაც.
  • 10 ნოემბერს ლევან ხაბეიშვილმა თქვა, რომ პროცესში არ ჩაერთვებოდა, თუმცა 16 ნოემბერს გადაიფიქრა, თავისი კანდიდატურა დააყენა და გამოვიდა ინიციატივით, რომ მიხეილ სააკაშვილის მდგომარეობასთან დაკავშირებით შეიქმნას შტაბი, რომელსაც გიორგი ჩალაძე უხელმძღვანელებს. რის შემდეგაც ჩალაძემ კანდიდატურა მოხსნა.
  • ენმ-ს წევრმა, ლევან ბეჟაშვილმა დღეს ბრიფინგზე მოითხოვა, რომ პარტიაში დაანონსებული არჩევნები დროულად ჩატარებულიყო.

დეტალები: სწორედ ამ ბრიფინგს გამოეხმაურა ნაყოფია და თქვა, რომ კოლეგების სიჩქარით გაკვირვებულია.

  • "მე ვფიქრობ, რომ ბევრად უფრო კორექტული და კარგი იქნებოდა, თუ ეს მოხდებოდა კონსულტაციების შედეგად, უბრალოდ, ერთი სართულით მაღლა იყო ასასვლელი პარტიის ოფისში, კოლეგებთან შეიძლებოდა საუბრის გამართვა და ერთიანად შეთანხმებულიყვნენ თარიღზე", — აღნიშნა მან.
  • მისივე თქმით, ძალიან კარგად ესმის, რომ არჩევნები პარტიაში ღიად და გამჭვირვალედ უნდა ჩატარდეს.
  • ნაყოფიას განცხადებით, ყველაფერს გააკეთებენ იმისთვის, რომ საარჩევნო კამპანია იყოს ღირსეული.
  • "მთავარი ბრძოლა არის წინ, ეს არის მიხეილ სააკაშვილის თავისუფლება. მთავარი ბრძოლა არის წინ, ეს არის დღევანდელი ხელისუფლების, ქართული ოცნების და ბიძინა ივანიშვილის შეცვლა", — ამბობს ნაყოფია.
  • პოლიტსაბჭოს სხდომა ერთიანი ნაციონალური მოძრაობის ოფისში 2022 წლის 11 დეკემბერს, 15:00 საათზე გაიმართება.