ამის შესახებ საერთაშორისო გამჭვირვალობა-საქართველო წერს.

რატომ არის მნიშვნელოვანი: ორგანიზაციის თქმით, თბილისის საქალაქო სასამართლოს გადაწყვეტილება, რომლითაც ნაწილობრივ დაკმაყოფილდა თბილისის მერის, კახა კალაძის სარჩელი, ტელეკომპანია პირველისა და ჟურნალისტ მაია მამულაშვილის წინააღმდეგ, წარმოადგენს მედიაზე ზეწოლის ახალ ეტაპზე გადასვლას.

  • მათი თქმით, ხელისუფლების წარმომადგენლები სასამართლოს იყენებენ კრიტიკული მედიის შესავიწროებლად.
  • "ჟურნალისტების წინააღმდეგ ფიზიკური ძალადობის, მასობრივი უკანონო მოსმენებისა თუ მიზანმიმართული დეზინფორმაციის პარალელურად, ბოლო პერიოდში მმართველი პარტიის მხრიდან ხდება სასამართლო ხელისუფლების ბოროტად გამოყენება", — წერს გამჭვირვალობა.

დეტალები: TI-ის ამბობს, ბოლო ერთი წლის განმავლობაში 28 სარჩელი შევიდა სამი წამყვანი კრიტიკული ტელევიზიის მთავარი არხის, ფორმულასა და ტელეკომპანია პირველის წინააღმდეგ.

  • მათივე განცხადებით, მომჩივნების დიდი ნაწილი მმართველი პარტიის წარმომადგენლები და მათთან დაახლოებული პირები არიან.
  • "დროის მცირე მონაკვეთში კრიტიკული მედიის წინააღმდეგ სარჩელების სიმრავლე აშკარად კოორდინირებულ ტენდენციაზე მიანიშნებს, რაც მედიის საქმიანობის შეზღუდვასა და დაშინებას ისახავს მიზნად", — ნათქვამია განცხადებაში.
  • ორგანიზაცია, სასამართლო პრაქტიკის ცვლილებას სამწუხაროს უწოდებს და ამბობს, რომ კანონმდებლობით დადგენილი ცალსახა ჩანაწერის მიუხედავად, მტკიცების ტვირთი ჟურნალისტზე გადადის.
  • მათი თქმით, ტენდენციის გაგრძელებაა, რომ ჯარიმის თანხის, 15 ათასი ლარის დაკისრება, სასამართლომ ტელეკომპანია პირველთან ერთად, ჟურნალისტ მაია მამულაშვილსაც დააკისრა.
  • კანონით, მედიაში ჟურნალისტის მიერ გამოქვეყნებულ ცილისწამებასთან დაკავშირებული სასამართლო დავისას მოპასუხე მედიის მესაკუთრეა.

TI-ის შეფასებით, კრიტიკულ მედიაზე ზეწოლის ამგვარი ტალღა, სრულიად ესადაგება კლეპტოკრატიული მმართველობისთვის დამახასიათებელ ერთ-ერთ ნიშანს, როცა კორუფციულ თემებზე მომუშავე ჟურნალისტების გაჩუმებას, მათ წინააღმდეგ სასამართლოში ცილისწამების სარჩელების შეტანით ცდილობენ.

  • ორგანიზაცია ხელისუფლებას მოუწოდებს, იმოქმედონ ქვეყნის ინტერესებიდან გამომდინარე და უზრუნველყონ კრიტიკული მედიის დაცვა, თავისუფალი საქმიანობა და შეწყვიტონ საკუთარი გავლენების გამოყენება მედიის შესავიწროებლად.
  • "არსებული მდგომარეობა მნიშვნელოვნად აფერხებს ქვეყნის დემოკრატიულ განვითარებას და აზიანებს საქართველოს ევროპულ პერსპექტივას", — წერს საერთაშორისო გამჭვირვალობა-საქართველო.