დღეს, 30 ნოემბერს თბილისის საქალაქო სასამართლომ TV პირველსა და ჟურნალისტ მაია მამულაშვილს კალაძისთვის 15 ათასი ლარის გადახდა დააკისრა.

რატომ არის მნიშვნელოვანი: თბილისის მერი პატივის, ღირსებისა და საქმიანი რეპუტაციის შემლახველი ცნობების უარყოფასა და მორალური ზიანის სახით 100 ათასი ლარის ანაზღაურებას ითხოვდა.

  • კალაძე ამბობდა, რომ გადაცემაში მამულაშვილმა გააჟღერა "სიმართლესთან შეუსაბამო" ინფორმაცია, რომ მან "ერთ-ერთ ტენდერში ჯიბეში ჩაიდო 60 მილიონი".
  • ტელევიზიის იურისტი, ქეთი ზანდუკელი აღნიშნავდა, რომ ინფორმაცია პირველად არა მამულაშვილის ეთერში, არამედ 2019 წლის 18 მაისს გავრცელდა და მას შემდეგ არაერთმა წყარომ თუ პირმა საჯარო სივრცეში გაიმეორა.

დეტალები: კალაძის თქმით, სასამართლოს გადაწყვეტილების აღსრულებასა და TV პირველისგან გავრცელებული ინფორმაციის უარყოფას ელოდება.

  • "არ მაქვს მოლოდინი, რომ არხი შეცვლის პოლიტიკას და აღარ იქნება კონკრეტული პოლიტიკური ჯგუფის რუპორი, მათი დაკვეთების შემსრულებელი. არც იმის მოლოდინი მაქვს, რომ სხვა დროს აღარ მოგვიწევს სასამართლოში შეხვედრა", — წერს კალაძე.
  • მისი თქმით, არავის არ უნდა მიეცეს უფლება, "ნორმად აქციოს ტყუილი, შანტაჟი და დეზინფორმაციის გავრცელება".
  • "ყველაზე მეტად ეს გაზარალებთ თქვენ, ქართულ მედიას, რადგან, ის რაც გადის ტელეეთერებით ან იწერება საინფორმაციო საშუალებებში, პირდაპირ შეეხება თოთოეულ თქვენგანს. საბოლოოდ კი, მედიის ენით გადმოცემული აგრესია და სიძულვილი ილექება საზოგადოებაში", — ამბობს თბილისის მერი.