კოალიცია დამოუკიდებელი და გამჭვირვალე მართლმსაჯულებისთვის ლევან მურუსიძის და დიმიტრი გვრიტიშვილის იუსტიციის უმაღლესი საბჭოს წევრებად ხელახალ არჩევას გამოეხმაურა.

რატომ არის მნიშვნელოვანი: ლევან მურუსიძე და დიმიტრი გვრიტიშვილი ე.წ. სასამართლო კლანის გავლენიან წევრებად მოიაზრებიან.

  • საბჭოში წევრების ადგილი მას შემდეგ გახდა ვაკანტური, რაც უკვე ყოფილმა წევრებმა, გოჩა აბუსერიძემ და გიორგი გოგინაშვილმა თანამდებობები საკუთარი ინიციატივით დატოვეს.
  • მოსამართლეები არ დაინტერესებულან საბჭოს ძველი წევრების წასვლის მიზეზებით და არც ახლად არჩეული წევრების გეგმებით.
  • არასამთავრობო სექტორმა, საერთაშორისო პარტნიორებმა და ოპოზიციამ არაერთხელ აღნიშნა, რომ მოსამართლეთა ნაწილი გადაწყვეტილებებს მმართველი გუნდის პოლიტიკური დაკვეთით იღებს.

დეტალები: 23 ოქტომბერს საქართველოს მოსამართლეთა XXXI კონფერენცია გაიმართა.

  • კონფერენციის დღის წესრიგში ერთ-ერთი საკითხი იუსტიციის უმაღლესი საბჭოს ორი მოსამართლე წევრის არჩევა იყო.
  • კონფერენციის დღემდე უცნობი იყო, თუ ვინ იქნებოდა საბჭოს წევრობის კანდიდატები.
  • კონფერენციაზე დამსწრე 279 მოსამართლიდან აბსოლუტურმა უმრავლესობამ მხარი დაუჭირა დასახელებულ კანდიდატურებს.

კოალიციის განცხადებით: მურუსიძე-გვრიტიშვილის ხელახალი არჩევით გაძლიერდება სასამართლოში არსებულ კლანური მმართველობა და არაფორმალური გავლენები, ამასთან:

  • სასამართლო სისტემაში მნიშვნელოვან პოზიციებზე პირების ამგვარი პროცესებით დანიშვნა წინააღმდეგობაში მოდის ევროკომისიის 12 პუნქტიანი რეკომენდაციების შინაარსთან.
  • ეს არის პირდაპირი პასუხი საერთაშორისო პარტნიორების მიმართ, რომ არ არსებობს სასამართლო სისტემის ფუნდამენტური რეფორმისა და გაჯანსაღებისა ნება.

შეფასებები: იუსტიციის უმაღლეს საბჭოში მურუსიძისა და გვრიტიშვილის ხელახალ დანიშვნას პოლიტიკური პარტიებიც გამოეხმაურნენ:

  • პარტია ლელო მომხდარს აფასებს როგორც ევროინტეგრაციის პროცესზე ღია თავდასხმას და მართლმსაჯულების ინსტიტუტზე ტოტალური კონტროლის დამყარების მცდელობას.
  • სტრატეგია აღმაშენებელში ამბობენ, რომ "პრორუსმა ქართულმა ოცნებამ გააკეთა უკვე არჩევანი ბრიუსელსა და მოსკოვს შორის, მოსკოვის სასარგებლოდ".

ხელმომწერები: კოალიცია დამოუკიდებელი და გამჭვირვალე მართლმსაჯულებისთვის 40 არასამთავრობო ორგანიზაციას აერთიანებს.

  • ხელმომწერთა სრული სია შეგიძლიათ იხილოთ ლინკზე.