ინფორმაციას ამის შესახებ უკრაინის გენერალური შტაბი ავრცელებს.

რატომ არის მნიშვნელოვანი: 10 სექტემბერს ვოლოდიმირ ზელენსკიმ განაცხადა, რომ შეიარაღებულმა ძალებმა ხარკოვის ოლქის 30-ზე მეტი დასახლებული პუნქტი გაათავისუფლეს.

  • 29 აგვისტოს სამხრეთის მიმართულებით უკრაინა შეტევაზე გადავიდა და ამ დროისთვის უკვე აქვს გარკვეული წარმატება — აქტიური კონტრშეტევა გრძელდება აღმოსავლეთშიც.
  • ISW-ის ცნობით, 5 დღეში უკრაინამ იმაზე მეტი ტერიტორია გაათავისუფლა, ვიდრე რუსეთმა აპრილის შემდეგ დაიპყრო.

დეტალები: გენშტაბის ცნობით, 11 სექტემბერს, მთელი დღის განმავლობაში ოკუპანტებმა 18 სარაკეტო და 39 საჰაერო დარტყმა განახორციელეს, მათ შორის, სამოქალაქო ობიექტებზეც.

  • დაზარალდა 30-ზე მეტი დასახლება.

მიუხედავად ამისა, უკრაინის თავდაცვის ძალებმა მტრის თავდასხმები მოიგერია მაიორსკთან და კრასნოროვნკასთან — ბრძოლა გრძელდება ნიკოლაევკა და ზაიცევოს რაიონებში.

  • გენშტაბი, ასევე, მიუთითებს, რომ ხარკოვისა და დონეცკის ოლქების რუსი დამპყრობლებისგან გათავისუფლება გრძელდება, რუსული ჯარები კი სწრაფად ტოვებენ პოზიციებს.
  • თავდაცვის ძალების ავიაციამ რუსეთის ოცეულის ბაზას, სამხედრო აღჭურვილობასა და საზენიტო სარაკეტო სისტემას შეუტია.
  • ასევე, განადგურებულია უპილოტო საფრენი აპარატი, ოთხი საზღვაო რაკეტა და ხუთი საჰაერო ტიპის რაკეტა.

12 სექტემბრის მონაცემებით, ომის დაწყების დღიდან დღემდე 52 950 რუსი ჯარისკაცი დაიღუპა.

  • განადგურებულია 2 168 ტანკი, 243 თვითმფრინავი და 213 ვერტმფრენი.