Biletebi.ge-მ ოფიციალურ Facebook-გვერდზე კულტურის სამინისტროს ღია წერილით მიმართა.

რატომ არის მნიშვნელოვანი: გალკინმაც და მაკარევიჩმაც უკრაინაში ომი დაგმეს და კრემლის პოლიტიკა ღიად გააკრიტიკეს.

  • მაქსიმ გალკინმა რუსეთის უკრაინაში შეჭრის შემდეგ ქვეყანა დატოვა.

დეტალები: Biletebi.ge აღნიშნავს, რომ 3 კონცერტის ორგანიზატორს დარბაზის მიერ უარი ეთქვა, რისი ფორმალური მიზეზიც სარემონტო სამუშაოებია. თუმცა მათი თქმით, რეალურად ეს პოლიტიკური კონტექსტის გამო მოხდა.

  • "აკრძალეს არტისტები (მაკარევიჩი, გალკინი), რომლებიც ღიად უჭერენ მხარს უკრაინას და რომელთაც მხარს უჭერენ უკრაინელები. გადახედეთ კომენტარებს არტისტების მომართვებზე";
  • "თუმცა მოტივაცია მაინც ბოლომდე გაუგებარია. თუ გვეშინია კერძო კომპანიის მიერ რუსეთის ოპოზიციური არტისტების შემოშვება, რათა რუსეთში ვინმე არ გაღიზიანდეს, რა იქნება შემდეგი ნაბიჯი? ფეისბუქსაც ავკრძალავთ?";
  • Biletebi.ge კომენტარებში წერს, რომ ამ ეტაპზე მოლაპარაკებები მიმდინარეობს და კონცერტთან დაკავშირებულ ინფორმაციას საზოგადოებას უახლოეს პერიოდში მიაწვდიან.

Biletebi.ge-ის თქმით, ეს არის "საკონტროლო გასროლა" საკონცერტო ინდუსტრიის მიმართულებითაც, რადგან ამ 3 გაუქმებულ კონცერტს მრავალი სხვაც მოჰყვება.

  • "აღარავინ გარისკავს ასეთ გარემოში ისედაც სარისკო ლოგისტიკაში ფულის ჩადებას. დღესდღეობით არტისტების 70%, ვისი ჩამოყვანაც შეიძლება იყოს კომერციულად მომგებიანი არის პოსტ-საბჭოთა ქვეყნებიდან";
  • "ბევრს ეს არ მოსწონს — გასაგებია. დროთა განმავლობაში გავალთ დასავლურ არტისტებზეც, თუმცა ამისთვის საჭიროა არ გავაკოტროთ და მივცეთ განვითარების საშუალება იმათ, ვინც ამ სფეროში მუშაობს".
  • "მოკლედ, გვჭირდება ზუსტი თამაშის წესები, რომ არ ვიყოთ დამოკიდებული ჩინოვნიკების კულუარულ აკრძალვებზე, თან ყველაზე კრიტიკულ მომენტებში მაქსიმალური ზარალის მიყენებით. გვჯერა, რომ სახელმწიფო უნდა გვეხმარებოდეს და არ გვმტრობდეს".

რას ამბობენ სპორტის სასახლეში: როგორც სასახლის ხელმძღვანელმა On.ge-ის განუცხადა, ფიქრობდნენ, რომ სარემონტო სამუშაოებთან დაკავშირებული პრობლემა აღმოიფხვრებოდა და მოასწრებდნენ, თუმცა ის "კიდევ უფრო დამძიმდა".

  • "Biletebi.ge-თან არანაირი შეხება არა გვაქვს, ეს ალბათ ორგანიზატორებმა დაუკვეთეს ბილეთების გაყიდვა, საერთოდ რის საფუძველზე აკეთებს [ამ განცხადებას]";
  • "სამწუხაროდ, პრობლემა ჩვენ გვქონდა, უნდა აღმოგვეფხვრა ეს პრობლემა და გამძაფრდა — კონდიცირება, ვენტილაცია და ამდენი ხალხისთვის ეს ნამდვილად უსაფრთხოების კუთხით. ჩვენი მხრიდან, სპორტის სასახლის მხრიდან ასეთ პასუხს მოგცემდით", — განაცხადა მან;
  • On.ge დაკავშირებას ცდილობს კულტურის სამინისტროსთანაც — მათ პასუხს მიღებისთანავე შემოგთავაზებთ.