იუსტიციის მინისტრის აზრით, ბრალდება, თითქოსდა ღარიბაშვილმა რამე განცხადება შეგნებულად გააკეთა, "ან ასე შემდეგ", არის ყოვლად დაუშვებელი.

რატომ არის მნიშვნელოვანი: იმის გარდა, რომ ღარიბაშვილმა აგვისტოს ომის მე-14 წლისთავზე განცხადება არა 7, არამედ 8 აგვისტოს გამოაქვეყნა, პოსტში მან აფხაზეთის ოკუპაციის პერიოდი შეამცირა.

  • "14 წელია ჩვენი ქვეყნის გული — სამაჩაბლო, ცხინვალის რეგიონი და აფხაზეთი რუსეთის მიერ არის ოკუპირებული", — წერდა ის.
  • მართალია, "დამოუკიდებლებად" რუსეთმა ეს რეგიონები აგვისტოს ომის შემდეგ აღიარა, თუმცა აფხაზეთზე კონტროლი საქართველოს ხელისუფლებამ 1990-იან წლებში, ომის შემდეგ დაკარგა.
  • დღეს ჟურნალისტებმა პრემიერთან ამის დაზუსტება სცადეს, თუმცა ღარიბაშვილმა მათი ინტერესი პროვოკაციად შეაფასა.

ბრეგაძე ამბობს, რომ ამჟამინდელ პრემიერმინისტრსა და ყოფილ თავდაცვის მინისტრს ძალიან ბევრი აქვს გაკეთებული ამ ქვეყნისთვის და კონკრეტულად თავდაცვის ძალებისთვის.

  • "ის ყველაზე წარმატებული თავდაცვის მინისტრი იყო. დამერწმუნეთ, მან ძალიან კარგად იცის საქართველოს ისტორია".
  • კითხვაზე, იყო თუ არა ღარიბაშვილის პოსტი ტექნიკური შეცდომა, ბრეგაძემ არ უპასუხა.

პრემიერმინისტრის განცხადების შემდეგ თანაგუნდელებმა, როგორც სჩვევიათ, მისი დაცვა დაიწყეს.

  • მაგალითად დეპუტატმა მათიკაშვილმა ღარიბაშვილის მსგავსად, არ ახსენა ის, რომ სოხუმის დაცემის შემდეგ აფხაზეთს სწორედ რუსეთი მართული სეპარატისტული ჯგუფები აკონტროლებდნენ.
  • ნაცვლად ამისა, დაწერა, რომ 2008 წლამდე რუსული ჯარი ამ რეგიონში სამშვიდობო სტატუსით იდგა.
  • ვიცე-პრემიერი ლევან დავითაშვილი კი ამბობს, რომ პრემიერმა "ყველაფერი მშვენივრად იცის".

კონტექსტი: 1990-იან წლებში მიმდინარე კონფლიქტების შემდეგ, რუსეთმა ისარგებლა სიტუაციით და საქართველო რეგიონებში "მშვიდობისმყოფელების" შეყვანაზე დაითანხმა. ისტორიკოსების შეფასებით, მაშინ ქვეყანა დიპლომატიურად იზოლირებული იყო და ამიტომაც რუსეთმა შეძლო მისი იძულება.

  • აფხაზეთში მთელი სამშვიდობო კონტინგენტი რუსი სამხედროები იყვნენ. ცხინვალის რეგიონში კი განსხვავებული ფორმატი იყო, რომელიც 3 ბატალიონისგან შედგებოდა.
  • სხვადასხვა ჩანაწერი მოწმობს, რომ აგვისტოს ომის დროს ცეცხლი ე.წ. მშვიდობისმყოფელების სტატუსით მყოფმა რუსმა ჯარისკაცებმაც გახსნეს.